Бүгүн Россия үрдүнэн орто анал үөрэхтээһин күнэ бэлиэтэнэр. Улууспутугар орто анал идэлээх каадырдары бэлэмниир соҕотох кыһанан Уус Алданнааҕы техникум буолар.
Бу күнүнэн сибээстээн үөрэх сүүрээнин техникум үлэһиттэрэ уонна устудьуоннара сырдаталлар.
Ольга Новоприезжая, социальнай педагог:
– Техникумҥа быйылгы үөрэх дьылыгар 152 устудьуон үөрэнэр. Маҥнайгы кууруска үөрэнээччилэргэ академическай стипендия кээмэйэ 2158 солк., хорошистар 2697 солк., отличниктар 3236 солк. ылаллар. Ону таһынан социальнай стипендия 3236 солк., анал байыаннай дьайыы кыттыылаахтарын оҕолоругар бэриллэр специальнай стипендия 6547 солк. буолар.
Александра Ноговицына, техникум методиһа:
– Методическай өттүнэн сүрүн ыытыллар үгэс буолбут тэрээһиннэргэ педагогическай үлэһиттэрбит уонна устудьуоннарбыт кытталлар. Ол курдук, алтынньыттан саҕалаан «Шаг в будущую профессию» өрөспүүбүлүкэтээҕи форум, «Профессионалы» күрэс, интеллектуальнай марафон, устудьуоннар уонна педагогтар научнай-практическай конференциялара, общеобразовательнай предметтэр олимпиадалара, демонстрационнай экзаменнар буолаллар.
Николай Ордахов, производственнай үөрэхтээһин маастара:
– Быйылгы үөрэх дьылыгар «Мастер по ремонту и обслуживанию автомобилей» маҥнайгы куурус бөлөҕүн үөрэтэбин. Бөлөххө 22 үөрэнээччилээхпин. Бастакы кууруска сүрүннээн общеобразовательнай предметтэри үөрэтэллэр. Иккис куурустан практическай дьарык автосервиспытыгар буолар. Онно мотор коробкатын ыһаллар, таҥаллар, онтон да атын массыынаны көрүү-харайыы өттүн барытын тутан-хабан үөрэтэллэр.
Левина Мария, «Повар, кондитер» 1-кы кууруһун устудьуона:
– Мин Кэбээйиттэн кэлэн үөрэхпин саҕалаатым. Үөрэхпит аныгы оборудованиенан толору хааччыллыыллыылаах мастерскойга ааһар. Маастардарбыт биһигини ас астааһын араас мындырдарыгар үөрэтэллэр.
Мин санаабар, повар, кондитер идэтигэр ураты көрүү (креативность), дисциплина, араас ыарахаттары тулуйуу, ыраастык туттуу о.д.а. хаачыстыбалар наадалар.
Алена Охлопкова, уопсай сэбиэдиссэйэ, иитээччи:
– Оҕолор олорор уопсай дьиэлэрэ 2 этээстээх 130 миэстэлээх. Студеннар үгүстэрэ үөһээ этээскэ олороллор. Аллараа этээскэ ас астаналларыгар кухня, иллэҥ кэмнэрин туһалаахтык атааралларыгар араас көрүҥ куруһуоктар хосторо, библиотека, сынньанар хос, санузел баар. Уопсай дьиэ толору хааччыллыылаах.
Студеннар хосторго иккилии-үстүү буолан үөрэнэр группаларынан, доҕордоһор табаарыстарын кытта олороллор.
Биһиги техникуммутугар Республика араас улуустарыттан кэлэн үөрэнэллэр – кинилэр интэриэстэрин таба үктээн араас хайысхалаах куруһуоктар үлэлииллэр. Ол курдук, иис-уус куруһуоктара «Очумелые ручки», «Фантазия», «Уютизация общежития», чэлгитии куруһуога «Озеленение», үҥкүү куруһуога «Дайыы», спортсекциялар – теннис, остуол оонньуулара.Куруһуоктарга оҕолор сөбүлээн дьарыктаналлар, үгүс күрэхтэргэ, конкурстарга кыттабыт, сэмэй кэккэ ситиһиилэрдээхпит.
Выпускник оҕолорбут куруутун кэлэн ыалдьыттаан, сэлэһэн-кэпсэтэн бараллара биһиэхэ олус күндү. Ол курдук, 80-с сыллардааҕы выпусктар уопсайбытыгар түөрт конфоркалаах плитка оһох, уу иһэр кулер бэлэхтээбиттэрэ элбэҕи кэрэһэлиир. Сылын ахсын бүтэрэн барар оҕолорбут сэмэй бэлэхтэрин туттараллар: ЗЧС-19 микроволновка, МПРИОА-23 тумбалаах, полкалаах остуол, ПК-21 ларь. Бу ис сүрэхтэн бэлэхтэммит маллар общежитие үлэтэ тупсарыгар төһүү күүс-көмө буолаллар.
Бары биир идэлээхтэрбитин профессиональнай бырааһынньыккытынан эҕэрдэлиибит! Баҕарабыт эһиэхэ үлэҕитигэр үрдүк ситиһиилэри!
Алена Стрекаловская