Оҕону иитиигэ «Оҕо саас сирдьиттэрэ» хамсааһын муниципальнай куратора Мария Винокурова улахан сүүмэрдээһини ааһан ыҥырыы тутан, Саха сириттэн үс бэрэстэбиитэл иһигэр киирэн, от ыйын бүтэһик күннэригэр Ставропольскай кыраай Пятигорскай куоратыгар «Машук» Билии киинигэр үс күннээх үөрэххэ сылдьан элбэҕи билэн-көрөн кэллэ.
Бу сырыытын туһунан Мария Платоновна кылгастык билиһиннэрэр:
– Дойду үрдүнэн саҥа үөрэх дьылыгар бэлэмнэнии, үлэни былааннааҺын саҕаланна. Пятигорскай куоракка
Бүтүн Арассыыйатааҕы «Машук» Билии киинигэр “Оҕо саас сирдьиттэрэ уонна төрөппүт түмсүүтэ – кэскилгэ бииргэ үлэлэһии” («Навигаторы детства и родительское сообщество: партнёрство для будущего») диэн үөрэх программата ыытылынна. Барыта 200 киһи кытынна – муниципальнай кураатардар, иитэр үлэҕэ дириэктэр сүбэһиттэрэ уонна төрөппүттэр. Саха сириттэн үс бэрэстэбиитэл улахан күрэһи ааһан ыҥырыыны туппуппут. Чурапчы, Хаҥалас улуустарыттан иитэр үлэҕэ дириэктэр сүбэһиттэрэ уонна мин маннык үрдүк таһымнаах үөрэххэ кыттыыны ылар чиэскэ тиксибиппит.
Үс күн устата Арассыыйа Үөрэххэ министиэристибэтин иһинэн үлэлиир төрөппүт кэмитиэтин бэрэстэбиитэллэрин, оҕону иитиигэ быһаччы үлэлии сылдьар салайар үлэһиттэр, «Билии» уопсастыба бастыҥ лиэктэрдэрин үөрэх эйгэтин билиҥҥи ирдэбиллэрин, саҥа чинчийиилэрин туһунан лиэксийэлэрин иһиттибит. «Машук» киин генеральнай дириэктэрэ, Арассыыйатааҕы «Билии» уопсастыба генеральнай дириэктэрин солбуйааччы Антон Сериков, РФ Үөрэххэ министиэристибэтин иитиигэ, эбии үөрэхтээһиҥҥэ уонна оҕо сынньалаҥар государственнай политикаҕа Департаменын дириэктэрин солбуйааччы Лариса Бебешко, «Росдетцентр» ФГБУ үөрэх киинин салайааччытын солбуйааччы Анна Сергутина лиэксийэлэрэ сэҥээриини ыллылар. Маны тэҥэ Арассыыйа кэккэ регионнарын бэрэстэбиитэллэрэ төрөппүт кэмитиэтин кытта үлэлэрин уопутуттан кэпсээтилэр, санаа атастаһыыта ыытылынна. Оскуола уонна төрөппүт бииргэ үлэлээһин механизмнарын, хардарыта көмөлөһүү суолларын тобулуу буолла уонна бөлөхтөрүнэн бырайыак оҥорон көмүскээһин тэрилиннэ.
Оҕону иитиигэ төрөппүт оскуоланы кытта тэҥҥэ бииргэ үлэлэһэрин наадалааҕын ыйдылар. Былырыын иитэр үлэҕэ дириэктэр сүбэһиттэрэ төрөппүт чаттарын арыйбыттара, төрөппүт үөрэх эйгэтигэр туох буола турарын барытын билэ олорор кыаҕы ылбыта. Оҕо оскуолаҕа ылбыт билиитин, көрүүтүн, сатабылларын салгыы дьиэ кэргэнигэр сайыннаран, оскуола уонна дьиэ кэргэн бэйэ-бэйэлэрин ситэрсэн биэрэн, биир тыыҥҥа оҕону иитиигэ хардыылар оҥоһуллубуттара. «Иитэр үлэҕэ дириэктэр сүбэһиттэрэ – төрөппүттэр – оскуола дириэктэрдэрэ – былаас» диэн сибээс биир ситимнээхтик үлэлиирин ситиһии – бүгүҥҥү сорукпут.
Иккис үөрэх сылын төрөппүт граннарын Бүтүн Арассыыйатааҕы күрэһэ ыытыллар, онно кэлэр үөрэх сылыгар биһиги улуус көхтөөхтүк кыттарыгар үлэ ыытыллыаҕа.
Арассыыйа араас муннуктарыттан бииргэ үлэлиир кэллиэгэлэрбитин кытта көрсөн, кэпсэтэн-ипсэтэн, элбэҕи билэн-көрөн кэллибит.
Елена Сыроватская, уопсас. кэрэсп.