Алита Базарова диэн бэрт номоҕон, кэрэчээн кыыс Майаҕас орто оскуолатын 10-c кылааһын быйыл бүтэрэн, былааннаабытын курдук быйыл Благовещенскай куоракка Амурдааҕы аграрнай колледж ветеринария салаатын устудьуона буолла.
Кини киһини өйдүүр буолуоҕуттан дьиэ кыылларын кытары үлэлиэн баҕарарын билэ улаатан, кэлин ол санаата ыра санаа буолан инники талбыт идэтин баһылыырыгар кынаттаатаҕа. Алита биэс сааһыттан кыралаан сүөһү көрүүтүн үлэтигэр сыстан барар, бастаан утаа эбэтин батыһа сылдьан, кини ынах ыыр кэмигэр аттыгар олорон кинини аралдьытан кэпсээн кэпсиирим, быыһыгар эбэтин ынахтарын, ньирэйдэрин ааттарын үөрэтэрэ. Эбэтэ сүөһү көрүүтүн ымпыгын-чымпыгын быһаарара, сүөһүлэр (ньирэй, борооску, тыһаҕас, ынах, оҕус), сылгылар (кулун, тый, биэ, атыыр, ат) көрүҥнэрин, маастарын үөрэтэрэ.
— Ол курдук хотоҥҥо сылдьарбын наһаа сөбүлүүрүм, улааттахпына хайаан да ветеринар буолуом,
— диэн бигэ санааламмытым диэн Алита кыыс кэпсиир.
— Кэнники үс сылга сайыҥҥы сынньалаҥым кэмигэр эбэбэр ынах ыаһан көмөлөһөбүн, уопсайа 7-8 ынаҕы күннэтэ ыыбын. Дьиэ кыылыгар интэриэһим ынах сүөһүнэн эрэ муҥурдамматаҕа. Оскуолаҕа үөрэнэ киирээт, ийэбин быһа хаайан джек-рассел-терьер диэн кыра боруодалаах биир саастаах ыттаммытым. Ыппын кытары бодьуустаһан, бэрт элбэх хамаандаҕа үөрэтэн, майгытын көннөрөн наһаа үчүгэй истиҥ доҕордоммутум. Оҕо сааһым баҕа санаата кыратык уларыйан, кинолог буолар эбиппин диэн быһаарыммытым. Бэйэм кыралаан ыттары үөрэтэн, ыттар боруодалара туох араастаахтарын, аналлаахтарын, майгыларын, ыарыыларын үөрэтэн билбитим. Билигин үс ыттаахпын, кинилэр олохторугар, доруобуйаларыгар эппиэтинэһи олоччу бэйэм сүгэбин,
— диэн астына сэһэргиир.
Кыыспыт оҕо сааһын ыра санаатын толорон, быйыл үөрэххэ туттарыста. Ким буолуон баҕарарын эрдэттэн билэр буолан, үөрэх тэрилтэлэрин саайтарын көрүтэлээн, ханна туох докумуоннары биэриэхтээҕин бэлэмнээн баран, убайын көмөтүнэн “Госуслуги” нөҥүө Амурдааҕы аграрнай колледжка ветеринар уонна кинолог хайысхаларын талан, үөрэххэ киирэргэ ирдэнэр докумуоннарын ыытар. Салгыы атырдьах ыйыгар ийэтин кытары Благовещенскай куоракка поеһынан айаннаан тиийэн, аттестатын туттара айанныыр. Толкуйданан баран ветеринария салаатын талар уонна кэлин кинологка эбии үөрэниэм диэн былааннанан, аны аҕыйах хонугунан төрөөбүт алааһыттан тэйэн, үөрэнэ бараары бэлэмнэнэ сылдьар.
Оҕо сааһын ыра санаатын олоххо киллэрэргэ дьулуһар кыыс кэлэр выпускниктарга туһаайан маннык санаатын тириэрдэр:
— Сүрэххит-дууһаҕыт тугу баҕарарынан идэҕитин талан, ыра санаа оҥостон, онно үөрэнэн, үлэһит киһи буоларгытыгар баҕарабын.
Билигин төһө да тыа хаһаайыстыбатыгар, чуолаан, сүөһүгэ-аска ыччат сыстыбат дииллэрин төһө да чаастатык иһиттэрбит, бу ыра санаатын толорорго эдэриттэн дьулуһар Алита Базарова курдук ыччат баара, тыа сирэ инникилээҕин, кэтит кэскиллээҕин көрдөрөр.
Светлана Сивцева