Бүгүн Мүрү нэһилиэгэр ааспыт сыл түмүктэрин таһаарар үөрүүлээх тэрээһин буолла. Үгэскэ кубулуйбут тэрээһин быйыл алгыстан саҕаланна. Ол кэннэ “Кэнчээри” ансаамбыл толоруутугар Мүрү нэһилиэгин Гимнэ ылланна. Онон алгыс, ырыа ситимнээх уратытык саҕаланна.
Сылы түмүктүүр тэрээһин диэн сыл устата ыытыллыбыт үлэни чөкөтүү, түмүү, бу кэм устатыгар бастыҥ көрдөрүүлэммиттэри чиэстээһин буолар. Мүрү нэһилиэгин баһылыга Прокопий Румянцев бэлиэ күнүнэн эҕэрдэлээн туран бастыҥнарга наҕараадалары туттартаата. Ол курдук урбаанньыт Захар Стрекаловскай, Мындаабатааҕы “Кэнчээри” уһуйаан сэбиэдиссэйэ Наталья Сивцева, үлэ бэтэрээнэ Михаил Дегтярев “Мүрү нэһилиэгин бочуоттаах олохтооҕо” үрдүк ааты ыллылар. Итини тэҥэ элбэх киһи “Мүрү нэһилиэгин социальнай-экономическай сайдыытыгар кылаатын иһин” бэлиэнэн, бочуотунай грамотанан наҕараадаланнылар.
Салгыы нэһилиэк бастыҥнарын улуус баһылыгын бастакы солбуйааччы Семен Бурнашев эҕэрдэлээтэ. Ол кэннэ урбаанньыт Айсен Васильевка “Уус Алдан улууһун социальнай-экономическай сайдыытыгар кылаатын иһин” бэлиэни, “Кэнчээри” ансаамбыл тэрийээччитигэр, салайааччытыгар Василий Парниковка “Үлэҕэ килбиэнин иһин” бэлиэни туттарда.
Мүрү нэһилиэгин дьокутааттарын Сэбиэтин бэрэссэдээтэлэ Олег Федоров уһуннук үлэлээбит түөлбэ салайааччыларыгар уонна уопсастыбаннай олох көхтөөх кыттааччыларыгар “Уопсастыба билиниитэ” анал бэлиэни туттарда. Барыта 8 киһи ылла.
Тэрээһин саамай сүрүн чааһынан сыл лауреаттарыгар анал ааттары туттарыы буолла. “Коммунальнай хаһаайыстыба бастыҥ үлэһитэ” Константин Оллонов, “Медицина эйгэтин бастыҥ үлэһитэ” оториноларинголог быраас Марфа Устинова, “Оскуола иннинээҕи саастаах оҕо тэрилтэтин бастыҥ үлэһитэ” иитээччи Мария Иванова («Мичил» уһуйаан), “Үөрэх эйгэтин бастыҥ үлэһитэ” Мүрү 1№-дээх орто оскуолатын учуутала Александра Копырина, “Култуура эйгэтин бастыҥ үлэһитэ” Мындааба кулуубун звукооператора Айаал Вырдылин, “Социальнай хааччыйыы бастыҥ үлэһитэ” Наталья Готовцева, «Бастыҥ үөрэнээччи” Мындааба оскуолатын 8-с кылааһын үөрэнээччитэ Арылхан Аржаков, “Бастыҥ уопсастыбанньык” Светлана Аржакова, “Дэлэй” маҕаһыын атыылааччыта, “Бастыҥ спортсмен” Чурапчытааҕы физкультурнай институт устудьуона Байан Васильев, “Бастыҥ бэтэрээн спортсмен” Мүрү 1№-дээх орто оскуолатын алын сүһүөх кылааһын учуутала Ольга Пестрякова, “Бастыҥ урбаанньыт” Айтал Керемясов, “Табыгастаах усулуобуйаны тэрийбит бастыҥ тэрилтэ” «СУ-77» тэрилтэ (сал. Петр Бурнашев) буоллулар. Маны тэҥэ Мүрү нэһилиэгиттэн төрүттээх быйылгы сылга бастыҥ көрдөрүүлээх спортсменнарга харчынан сертификаттары туттардылар. Оттон түөлбэлэр ортолоругар ыытыллыбыт комплекснай спартакиада кыайыылаахтарынан “Маяк”, “Мындааба”, “Мүрү” түөлбэлэр ааттаннылар
Тэрээһин түмүгэр нэһилиэк баһылыга Прокопий Румянцев быйыл ханнык сыл биллэриллэрин иһитиннэрдэ. Нэһилиэк актыыбын сүбэтинэн ааспыт Тупсаҕай эйгэни тэрийии сылын салгыырга быһаарбыттар. Онон 2026 сыл Мүрү нэһилиэгэр Тупсаҕай эйгэни тэрийии сылын иккис түһүмэҕинэн биллэрилиннэ.
Афанасий Сектяев