Бүгүн улуус баһылыга Василий Алексеев кулун тутар 17-18 күннэригэр Дьокуускайга буолбут»ИЙЭ ТЫЛ» II форум кыттыылаахтарын кытары көрүстэ.
Форум кыттыылаахтара улуустааҕы оҕо библиотекатын сэбиэдиссэйэ, «Сандаар» оҕо сахалыы ааҕыытын көҕүлүүр киин салайааччыта Вера Портнягина, Мүрү нэһилиэгин «Сэргэх олох» түмсүүттэн Варвара Новогодина, улуустааҕы «Күн» оҕо хамсааһынын бэрэссэдээтэлэ Коля Оллонов уонна улуустааҕы «Кэскил түһэ» ийэ тыл түмсүүтүн салайааччыта Светлана Бурцева улахан мунньахтан тугу көрөн-истэн, билэн кэлбиттэрин сиһилии сырдаттылар, салгыы бу хайысхаҕа үлэни тэрийэргэ бэйэлэрин санааларын тиэртилэр.
Василий Петрович барытын сэҥээрэн иһиттэ уонна улууска төрөөбүт тылы сайыннарыыга, сахалыы тыыннаах эйгэни тэрийиигэ бэйэтин көрүүлэрин үллэһиннэ. «Аны атын улууска баран көрөн-истэн кэлэргитигэр транспорт өттүнэн өйүүбүн, ол кэнниттэн уопсай барыл оҥостон үлэни саҥалыы тыынынан саҕалыахпыт», – диэтэ. Өссө суол сабыллыан иннинэ Дьокуускайтан Лена Заболоцкая салайааччылаах биир дойдулаахтарбыт бу хайысхаҕа нэһилиэктэринэн үлэлии кэлэллэрэ күүтүллэр. Итиэннэ «Тэтим» араадьыйаҕа улууска ыытыллар тыл сайдыытыгар ыытыллар үлэ туһунан анал биэрии тахсара былааннанар.
Светлана Бурцева, уопсас. кэрэсп.