Саха Өрөспүүбүлүкэтин дьиэ-уот коммунальнай хаһаайыстыбатыгар уонна энергетикаҕа миниистирэ Вячеслав Емельянов Бороҕон сэлиэнньэтин илин өттүгэр олорор элбэх оҕолоох Егоровтар дьиэ кэргэнигэр ыалдьыттаата.
Ыал аҕа баһылыга Виктор – анал байыаннай дьайыы кыттыылааҕа, 2022 сыллаахха мобилизацияҕа ыҥырыллан бастакытын барбыта, кэлин иккиһин хантараак түһэрсэн бара сылдьыбыта. Кини Бороҕоҥҥо спортивнай оскуолаҕа оҕолору боксаҕа дьарыктыыра, билигин завуч дуоһунаһыгар ананан үлэлии сылдьар.
Ыал ийэтэ Надежда бэйэ дьарыктаах. Кэргэнэ анал байыаннай дьайыыга барбытыгар санаатын түһэрбэккэ, социальнай хантараак түһэрсэн иистэнэр тэрил атыыласпыта уонна билигин массыыналар көбүөрдэрин тигэн биэрэр мастарыскыай арынан ситиһиилээхтик үлэлиир. Надежда дьыалата өссө Саха сиригэр “Социальнай хантараак чаҕылхай кейсэ” диэн ааттанан Москваҕа буолбут “Хоту дьахталлара” Бүтүн Арассыыйатаҕы II форумҥа спикер быһыытынан кыттыбыта. Ол туһунан “Мүрү саһарҕата” сырдатан турар – https://мюрюгазета.рф/nasha-zemlyachka-nadezhda-egorova-pokorila-ii-forum-zhenshhin-severa-v-moskve/
Дьиэ кэргэн үс оҕолоох. Улаханнара Петя – тутаах киһилэрэ, быйыл 9-с кылааска үөрэнэ киирэр эбит, бэҕэһээ эрэ Түүлээхтэн оттоон бүтэн кэлбит. “Эппитин-үүппүтүн хааччыйааччыбыт – кини”, – дэһэллэр. Егоровтар өссө игирэ кэриэтэ сылы-сыллатааҕы икки кыра кыыстаахтар: Айыына үһүс кылааска үөрэнэ киирэр, Анна – иккискэ. Оҕолор Мүрү 2-с нүөмэрдээх оскуолатыгар үөрэнэллэр, саҥа дьиэҕэ үөрэнэллэриттэн олус астыналлар.
“Дьиэ хаһаайката айар куттааҕа, иистэнэр дьарыктааҕа биллэр, дьиэ ис көрүҥэ барыта уурбут-туппут курдук лоп-бааччы, нус бараан уонна тупсаҕай”, – диэн Вячеслав Павлович бэлиэтии көрбүтүн эттэ. Кини үөрэх дьыла саҕаланара чугаһаабытынан оҕолорго үөрэххэ туттуллар сэмэй бэлэхтэрин туттартаата.
Дьиэ кэргэн күүтэр күүтүүлэрэ – киинтэн ититии. Үс сыллааҕыта хочуолунай тутуута былааннаммытыгар холбонорго аналлаах тэриллэрин ылбыттар, ол эрээри билигин уотунан барар конвектордары туһаналлар. «Тыйыс тымныы үгэннээн турар ыйдарыгар ороскуоппут 70 тыһыынчаттан тахса буолар», – диэн миниистири соһуттулар. Онон Вячеслав Павлович: «Ититии киириэҕэ», – диэн эрэннэрдэ.
Бүтэһигэр Надежда анал иистэнэр сирин көрдөрдө – эргэ дьиэни тупсаран биэрбиттэр, киэҥ-куоҥ, үлэлииргэ табыгастаах. Оробуочай бөлөх мастарыаскай киириитигэр ыйанан турар харысхалга харахтарын хатаатылар. Онуоха Надежда биһиги редакциябытыттан атыыласпытын эппитигэр, салайааччылар: «Олус бэрт хомоҕой тыллаах, алгыстаах харысхал мастарыскыайы араҥаччылыыр буолан, үлэтэ ситиһиилээх эбит», – дэстилэр.
Анатолий Кириллин