Мүрү 1-кы №-дээх орто оскуолатыгар эдэр учууталлар “На ступеньках роста-2025” улуустааҕы куонкурус саҕаланна. 2024 сыллаахха ыытыллыбыт эдэр учууталлар куонкурустарыгар Мүрү 1-кы №-дээх орто оскуолатын саха тылын, литературатын учуутала Саргылаана Федорова кыайыылаах аатын сүкпүтэ. Быйылгы куонкуруска улуус 10 орто оскуолатыттан уонна биир ситэтэ суох оскуолаттан барыта 11 эдэр учуутал кыттар.
Куонкурус үөрүүлээх аһыллыытын оскуола учууталлара Мария Васильева, Дьулус Рожин салайан ыыттылар, “Мүрү” БПК, “Кэнчээри” ансаамбыл уонна 7 “б”, 6 “а”, 6 “в” (кыл. сал. Д.Д. Гаврильева, Л.В. Бурцева, А.В. Ксенофонтова, А.А. Заболоцкая) кылаастар үөрэнээччилэрэ уонна Нарыйаана Черкашина ырыанан, хоһоонунан эҕэрдэлээтилэр. Куонкурус кыттыылаахтарын Мүрү 1-кы №-дээх орто оскуолатын дириэктэрэ Петр Баханов, үөрэх управлениетын начаалынньыга Федор Татаринов эҕэрдэлээтилэр, ситиһиилэри баҕардылар. Эдэр учууталларга туһаайан 2024 сыллааҕы куонкурус абсолютнай кыайыылааҕа Саргылаана Федорова бэйэтин эҕэрдэтин, баҕа санаатын тириэртэ.
Куонкурус кыттыылаахтарын үлэлэрин 12 учууталтан састааптаах экспердэр бөлөхтөрө сыаналыаҕа. Экспердэр бөлөхтөрүн таһынан улуус оскуолаларыттан тоҕус үөрэнээччи куонкуруһу көрөн кытааччыларга бэйэлэрин сыанабылларын биэриэхтэрэ.
Елена Сыроватская, уопсас. кэрэсп.