Саха сирин судаарыстыбаннай цирката өрөспүүбүлүкэ үрдүнэн 20 оҕону Кытайга Хэбэйскэй ускуустуба колледжыгар циркаҕа үөрэттэрэ ыытарга сүүмэрдээтилэр. Олор истэригэр биһиги улуустан Бэйдиҥэ орто оскуолатын 2-с кылааһын үөрэнээччитэ Дамир Ларионов талылынна.
Кини элбэх оҕону иитэр Саина, Сергей Григорьевтар иитиэх уоллара буолар. Дамир цирка умсугутуулах эйгэтигэр үктэнэргэ санаммытын туһунан маннык кэпсээтэ:
— Билигин тоҕус саастаахпын. Быйыл 2-с кылааһы туйгуннук үөрэнэн бүтэрдим. Ийэм циркаҕа кастинг буоларын туһунан эппитэ уонна цирка туһунан видеолары көрдөрбүтэ. «Циркаҕа үөрэннэххинэ эмиэ кинилэр курдук буолаҕын” — диэн эппитэ. Мин акробаттары көрөн ымсыырбытым, эмиэ кинилэр курдук күүстээх буолуохпун баҕарабын. Кыра сааспыттан эт-сиин өттүнэн күүстээхпин тулалыыр дьонум бэлиэтииллэр, ол эрээри, оннук имигэс буолбатахпын.
От ыйыгар икки күн устата кастинг буолбута. Барыбытын түөртүү буолан туруорбуттара, уочаратынан араас гимнастическай хамсаныылары оҥорон көрдөрбүппүт. Шпагат, мостик, кувырок, онтон да элбэҕи… Атырдьах ыйын 2-с күнүгэр түмүктүүр көрүү буолбута. Онно чопчу кимнээх Кытайга үөрэнэ баралларын талбыттара, түмүгү биллэрбиттэрэ. Алтынньы ыйтан үөрэхпит саҕаланар үһү. Соҕотоҕун ыраах сиргэ үөрэнэ барарбыттан кыратык толлобун да буоллар, оннук күүскэ долгуйбаппын.
Ити курдук, баҕа санаатын ситэргэ күүстээх санааны ылыммыт биир дойдулаахпытыгар ситиһиини баҕарыаҕын.
Мария Аргунова