Саха дьахтара ураты номох, кэрэ кэпсээн, ыраас иэйии буоллаҕа. Аар тайҕа алаастарын балаҕаныттан тахсыбыт саха дьахтара тугу кыайбатаҕай, тугу ситиспэтэҕэй? Ол да иһин кинилэр номоҕон дьүһүннэрэ, олохторун суола куруук ураты, интэриэһинэй!
Тыйыс айылҕалаах Сахабыт сирин үлэһит, үтүө дьахталларын сырдатар «Далбар Хотун» сурунаалга сурутуу ыытылла турар. Онуоха биһиги улууспут туора турбата. Ол курдук «Россия ийэлэрэ» хамсааһын улуустааҕы филиалын салайааччыта Ольга Алексеева, дьахталлар улуустааҕы сэбиэттэрин бэрэссэдээтэлэ Евгения Местникова, “Биир ньыгыл Россия” политическай партия политсэбиэтин чилиэнэ Евгения Аргунова көҕүлээһиннэринэн сурунаалга барыта 50 киһи сурутта. Ол иһигэр элбэх оҕолоох, тыа сирин уйгутун тутан олорор дьахталлар ортолоругар өрөспүүбүлүкэ таһымыгар бүгүн буолаары турар «Далбар Хотун» күрэскэ кыттаары сылдьар биир дойдулаахпыт Саина Григорьеваны өйөөн Бэйдиҥэ бөһүөлэгин 12 кэрэ аҥаара сурутта.
Кэрэни кэрэхсиир далбар хотуттарбытыгар махтанан туран, кэлэн иһэр Дьахталлар аан дойдутааҕы күннэринэн итиитик-истиҥник эҕэрдэлиибит.
Мария Аргунова