Дүпсүннэр доҕор космонавтара, Юрий Гагарина аатынан космонавтары бэлэмниир киин начаалынньыгын э.т., «Роскосмос» этэрээттэрин хамандыыра Олег Кононенко эһиил 2027 сылга куйаарга көтүөхтээх «Союз МС-31» хараабыл экипаһын хамандыырынан ананна.
Кини космоска алтыс көтүүтэ буолар. Бу көтүүтүгэр кини куйаарга Дүпсүннээҕи авиационнай мусуой оҕолоро оҥорбут сублимированнай аһылыктарын илдьэ тахсыахтаах. Ол туһунан кини быйыл сайын Дьокуускайга кэлэ сылдьан үрдүк сыанаттан эппитин олохтоохтор кэпсииллэр.
Санатар буоллахха, Россия Геройа, летчик-космонавт Олег Кононенко 2011 сыллаахха куйаарга тахсан саха хомуһун тыаһаппыта. Онтон 2015 сыллаахха космоска Алексей Кулаковскай-Өксөкүлээх Өлөксөй кинигэтин илдьэ тахсан, үрдүк куйаартан «Хомус» хоһоонун аахпыта.
Олег Кононенко 2016 сыллаахха СӨ Ил Дархана Егор Борисов ыҥырыытынан Саха сиригэр кэлэ сылдьыбыттаах. Онно ыраахтан кэлбит ыалдьыт биһиэхэ, Уус Алдаҥҥа, тахсан дьону-сэргэни кытта көрсүбүттээҕэ. Ол курдук Олег Кононенко дьиэ кэргэнинээн, «РИСКСАТ» космос эйгэтин үөрэтэр, научнай чинчийиилэринэн дьарыктанар ХЭУо генеральнай дириэктэрэ Алексей Кучейко, уо.д.а. буолан Суоттуга тиийэн, оччотооҕу «Доҕордоһуу» мусуой-комплекс дириэктэрэ, улуу суруйааччы Өксөкүлээх Өлөксөй сиэнэ Раиса Кулаковскаяны ааттаан-суоллаан анаан көрсүбүтүн, космонавтика, авиация эйгэтин сэҥээрэр, коллекционер Станислав Луковцев быыстапкатын кэрэхсии көрбүттэрин, салгыы республикаҕа соҕотох космонавтика уонна авиация мусуойун көрө Дүпсүҥҥэ тиийэн мусуой үлэтин көрөн-истэн, тыйыс тымныылаах кыһыннаах аар тайҕа оҕолоро космос, авиация эйгэтигэр умсулҕаннарын сөҕө-махтайбыттарын, куонкурустарга, научнай ааҕыыларга кыттыбыт үөрэнээччилэри көрсөн үөрбүттэрин туһунан өйдүүр буолуохтааххыт.
Онтон быйыл сайын космонавт Дьокуускайга Арктическай оскуолаҕа кэлэ сырыттаҕына дүпсүннэр анаан тиийэн көрсөннөр, мусуой туһунан кинигэни уонна сублимированнай аһылык бырайыагын ааптардарыттан биирдэстэрэ – Дүпсүн орто оскуолатын выпускницата Вика Сивцева космонавт аһылыгын туттарбыта. Оттон кыттыгас ааптар Вика балтыта Валерия – билигин 11-с кылаас үөрэнээччитэ.
Онон дүпсүннэр доҕор космонавтара эһиил куйаарга тахсарын кэтэһэбит.
Мария АРГУНОВА