Бүгүн С.С. Васильев-Борогонскай аатынан улуус киин библиотекатын ааҕар саалатыгар И.Н. Жирков аатынан Дүпсүн орто оскуолатын 1966 сыллааҕы выпускниктара оскуоланы бүтэрбиттэрэ 60 сылларын бэлиэтиир күннэригэр сиэттэрэн улуус дьахталларын общественнай хамсааһыннарын кытары көрсүһүүлэрэ тэрилиннэ.
Улуустааҕы кииннэммит библиотека тиһигин салайааччыта Лена Павлова эппитин курдук, көрсүһүүгэ выпуск саамай хорсун санаалаахтара сэттэ буолан кэллилэр: Анастасия Божедонова, Анна Бурнашева, Светлана Старостина, Евдокия Неустроева, Зинаида Стрекаловская, Полина Шелковникова уонна Мария Рожина. 60 сыл тухары биир кылаас оҕолоро дойду араас муннуктарынан тарҕастахтара дии, бары бииргэ Бороҕоҥҥо мустубуттарын, библиотекаҕа кэлбиттэрин иһин кинилэри дыбарыаһы кэритэ сылдьан көрдөрдүлэр, кэпсээтилэр.
1966 сыллааҕы Дүпсүн оскуолатын выпуһун «кыһыл көмүс выпуск» диэн ааттыыллар эбит, кылаас улахан аҥаара үрдүк үөрэхтэнэн, олох араас араҥатыгар, үлэ араас эйгэтигэр салайар үлэҕэ сылдьыбыттар.
Киэн тутта ааттыыллар – CӨ үөрэҕириитин үтүөлээх үлэһитэ, норуот үөрэҕириитин туйгуна, социология билимин кандидата, Саха Өрөспүүбүлүкэтин аан дойдуга ааттатарга үлэлэспит, Франциянан, АХШ-нан тилийэ көтөн тиийэн үлэлээбит Анастасия Николаевнаны, СӨ норуотун хаһаайыстыбатын үтүөлээх үлэһитин, СӨ государственнай гражданскай сулууспатын, үөрэхтээһинин, социальнай хааччыйыыга туйгунун Анна Прокопьевнаны уо.д.а.
Көрсүспүччэ выпускниктар үөрэнэ сылдьыбыт кэмнэрин ахтан-санаан аастылар, Анастасия Николаевна үлэлии сылдьыбыт кэмнэрин киһи эрэ истэ олоруон курдук таттарыылаахтык кэпсиириттэн кэм-кэрдии ааспытын билбэккэ да хааллыбыт.
Выпускниктары улуус дьахталларын общественнай хамсааһыннарын бэрэстэбиитэллэрэ: дьиэ кэргэн, ыччат политикатын улуустааҕы управлениетын начальнига, общественнай түмсүүлэри улуустааҕы координационнай сүбэҕэ ситимниир Валентина Андросова, улуус наставниктарын сүбэтин салайааччыта Наталия Говорова, Мүрү нэһилиэгин дьаһалтатыгар общественноһы кытары үлэлиир специалист Екатерина Бочкарева, “Умсулҕан” улуус коллекционердарын түмсүүтүн, “Күндүүнэ” Мүрү нэһилиэгин ансаамбылын салайааччы Анна Федорова, общественник, Геройдар аллеяларын сибэккилэрин үүннэрэн, олордон көрө-истэ сылдьар Светлана Аржакова, Мүрү нэһилиэгэр уруккуттан билиҥҥээҥҥэ диэри түөлбэ салайааччытынан үлэлиир Полина Черкашина, Саха балаҕанын үлэлэтэр Валентина Шадрина, библиотека ытыктыыр бэтэрээн салайааччыта, общественник Варвара Окоемова кытыннылар. Кинилэр выпускниктарга эҕэрдэ тылларын тиэртилэр, сибэкки дьөрбөтүн, бэлэх туттартаатылар.
Анна Прокопьевна: “Бэйэбит туһунан наһаа да үчүгэй тыллары иһиттибит”, – диэн кыттыылаахтарга махтанна, библиотека саҥа кабинеттарын, чуолаан электроннай өҥөнү оҥорор хайысхалаах кабинеты сэргээбитин эттэ.
1966 сыллаахха оскуоланы бүтэрбит оҕолор – Аҕа дойду сэриитин кэнниттэн дойду атаҕар турарын туһугар күүстээх үлэҕэ туруммут кэм оҕолоро. Ол да иһин үөрэҕи, үлэни дьүөрэлии тутан, туохтан да иҥнэн турбат кыайыгас-хотугас, ылсыбыттарын тиһэҕэр тиэрдэ улааппыттара, иитиллибиттэрэ. Билигин да учууталларыгар, оскуола дириэктэригэр махталларын ыһыктыбаттар, кинилэр үөрэтиилэрэ-такайыылара дьоһун дьон буола улааталларыгар тирэх буолбута дииллэр.
Анатолий Кириллин