Биһиги улууспутугар Чурапчы улууһуттан оҕолорго аналлаах социальнай-реабилитационнай киин үлэһиттэрэ тохсунньу 21 күнүгэр кэлэн бардылар. Кинилэр Уус Алданнааҕы социальнай кэлим кииҥҥэ сылдьан үлэһиттэри кытары көрүстүлэр, үлэни билистилэр.
Делегация салайааччыта – биир дойдулаахпыт Чурапчытааҕы оҕолорго аналлаах социальнай-реабилитационнай киин директора Мария Николаевна Саввина. Кини Чэриктэйтэн төрүттээх, учуутал идэлээх, салайар үлэҕэ уһуннук үлэлээбит баай уопуттаах, республикаҕа биллэр-көстөр үлэлээх салайааччы.
Бу икки улуус икки тэрилтэлэрэ уопут атастаһар сыаллаах иккис көрсүһүүлэрэ буолла. Чурапчытааҕы оҕолорго аналлаах социальнай-реабилитационнай киин базатыгар дьиэ кэргэҥҥэ элбэх өҥөнү оҥорор киин (Семейный многофункциональный центр) республикаҕа бастакынан арыллан үлэтин саҕалаан, билигин балай да ситиһиилэрдээх, холобур буолар кыахтаах киин буолан үлэлии олорор.
Биһиги улууспутугар оҕотуттан кырдьаҕаһыгар тиийэ социальнай үлэни тэрийэр киин салайааччыта Иннокентий Иннокентьевич Сергеев ыалдьыттарга икки сиринэн тэрилтэтин үлэтин көрдөрдө, билиһиннэрдэ. Улуус социальнай эйгэтин үлэһиттэрэ биир идэлээхтэрин үөрэ-көтө көрүстүлэр.
Ыалдьыттар саҥардыы икки тэрилтэ холбоһон, үлэлээбитэ сыл буолбут улахан тэрилтэ үс этээстээх дьиэтин-уотун сонурҕаан көрдүлэр-иһиттилэр. Салгыы киин тэйиччи турар оҕолорго аналлаах стационарнай отделениетыгар сырыттылар, специалистар үлэлэрин билистилэр, санааларын үллэһиннилэр.
Күн иккис аҥаарыгар кабинеттарынан, хайысхаларынан үлэ хаамыытын чопчулаан билсиһии, кэпсэтиһии, хардарыта санаа атастаһыыта тэрилиннэ. Специалистар бары маннык көрсүһүү көдьүүстээҕин, атах тэпсэн олорон кэпсэтии кэрэхсэбиллээҕин бэлиэтээтилэр, салгыы салҕанарыгар баҕаларын биллэрдилэр. Икки өттүттэн биир эйгэҕэ үлэлии сылдьарбыт быһыытынан бэйэ-бэйэбитин кытары билсэн-көрсөн, уопут атастаһан, сүбэлэһэн үлэлиирбит олус наадалаах уонна туһалаах диэн сырдык санаанан уратылаах көрсүһүү түмүктэннэ.
Светлана Бурцева, уопсас. кэрэсп.