Улуус баһылыгын сыллааҕы үлэтин отчуотун туруорар үһүс бөлөх бэҕэһээ, тохсунньу 21 күнүгэр, Чэриктэй, Дүпсүн нэһилиэктэригэр сырытта. Үлэ-хамнас биһирэнэр, ол эрээри кыһалҕа син биир баар. Олох-дьаһах баарын тухары кыһалҕа да ханна барыай? Күөрэйэн тахса турар буоллаҕа.
Алдан өрүс үрдүгэр олорор Чэриктэй бөһүөлэгэр дьоҥҥо көрдөрөр социальнай эбийиэктэрэ диэн улахан халаантан “тыыннарын өрүһүйбүт” таас оскуола эрэ баар. Манна кулууп, спортсаала диэн суох. Оҕо саада аҕыйах сыллааҕыта тутуллан баран, техническэй сыыһаттан хаарбах турукка киирбит. Онно өрөмүөн туруорсаллар да, ол улаханнык абырыырыгар соччо эрэммэттэр эбит. Оттон саҥаны тутууга үп-харчы көрүллүбэт. Биир саамай сытыы кыһалҕалара хочуолунайдара буоларын эттилэр. Бу эбийиэги туох баар араас таһымнаах хамыыһыйалар көрөн бараннар, 2023 сыллаахха хаарбах туруктааҕынан аахта оҥорбуттар. Кыаҕын таһынан ДьУоКХ олохтоох учаастагын үлэһиттэрин сатабылларынан үлэлии турар дииллэр. Онон баар эбийиэктэри сылытарын таһынан, эбии ыаллары холбуур хайдах да кыаллыбатын исписэлиистэр да бигэргэппиттэр. Туох баар култуурунай тэрээһиннэрин кыракый балаҕаҥҥа оҥороллор, кулууп манна үлэлии олорор. Онон КСК-ны эмиэ уруорсаллар. Хаһан эрэ эрэл кыыма саҕыллыа диэн бөҕөх санаалаахтар. Кыһалҕаҕа эбиискэлэһэн АТС-тара да, сотовай сибээстэрэ да уот бардар эрэ тэҥҥэ «ньим» бараллар эбит. Онон хараҥаҕа харбыалаһалларын таһынан киин сирдиин сибээһи туталлара эмиэ быстар. Хата ону Ростелеком бэрэстэбиитэлэ «аккумулятордарга сакаас оҥоһуллубута, бу күннэргэ кэлиэхтээх, оччоҕо кэлэн туруоруохпут» диэн үөртэ. Ити курдук чэриктэйдэр эргиччи кыһалҕа буолан олордоллор да, ону күннээҕи олох көстүүтүн курдук ылынаннар, үүнэ-сайда, олохторун тыынныы олороллор.
Салгыы ыаллыы Дүпсүн нэһилиэгин Бээди бөһүөлэгэр көрсүһүүгэ олохтоохтор сытыы кыһалҕабыт диэн тугу да этэллэрэ суох курдук буолла. Ол төрүөтүнэн быйыл бөһүөлэк олоччу киинтэн ититиигэ холбоммута буолара чахчы. Арай медпууннаах эрээри фельдшердэрэ суоҕун, бөһүөлэк иһинээҕи уот трансформатора быстар мөлтөх туруктааҕынан ону туоратары туруорустулар.
Киин бөһүөлэк Дүпсүн олох-дьаһах эргийэр киинэ буоллаҕа. Онон кыһалҕа да баара ханна барыай? Манна оскуола уонна оҕо саада өрөмүөнү эрэйбиттэрэ ырааппыт. Эргэрии түмүгэр дьиэлэр сөрүүкээбиттэр. Аны хочуолунайдара оһохторо быйыл улаханнык моһуоктааннар, элбэхтик саахал буола сылдьыбыт. Онон кыамталарын улаатыннарары туруорустулар. Маны тэҥэ дойду таһымыгар тиийэ сураҕырар космонавтика түмэлэ уонна олохтоох кыраайы үөрэтэр түмэл эмиэ дьиэтэ-уота суох хаалар кутталламмыттар. Билигин технопарк дьиэтин көрүдүөрүгэр тураллар эбит эрээри, бу тэрилтэ өрөспүүбүлүкэтээҕи буоларын быһыытынан, таһаартаары гынар эбит. Онон бу боппуруоһу быһаарары туруорсаллар.
Афанасий Сектяев