Кыстыкка киирэр алтынньыбыт үүнэн, тыа хаһаайыстыбатын салаатыгар сайыҥҥы үүт, от былаанын ситиһии, бааһынай, кэтэх хаһаайыстыбалар кыстыктарын оҥостууларын, тэриниилэрин туһунан улуустааҕы тыа хаһаайыстыбатын управлениетын салайааччытын солбуйааччы Матрена Ивановна Федорова билиһиннэрдэ.
– Күн бүгүн кыстыкка киириигэ улуус үрдүнэн ынах сүөһү ахсаана 15 779 төбөҕө тэҥнэһэр, онтон ыанар ынаҕа – 5 384 төбө, сылгы – 16 873, биэтэ – 8 335 төбө. Барыта үс улахан “Туйма”, “Дүпсүн”, “Мүрү Ас” астыыр-үөллүүр оҥорон таһаарар хаһаайыстыба, “Мэкэри”, “Биэттэ Агро” ХЭТ, сылгы иитиитинэн 6 потребительскай кооператив, 154 бааһынай хаһаайыстыба баар.
Үүтү тутуу былаана 78,02 бырыһыан туолла. Ол иһигэр “Мүрү Ас” ТХПК былаанын 82,24 бырыһыан, “Туйма” ТХПК – 72,55 бырыһыан, “Дүпсүн” ТХПК – 70,42 бырыһыан толордулар.
Быйыл от үүнүүтэ үчүгэй, онон бары хаһаайыстыбалар отунан хааччыллан олороллор, барыта 32 366 туонна оттонно, былаан 104,4 бырыһыан туолла. Маны тэҥэ 200 туонна сенаж, 360 туонна сиилэс бэлэмнэннэ, эбии аһылык былаана 100 бырыһыан туолла.
Туораахтаах культура валовайынан 1214,1 туонна хомулунна, ол иһигэр сэлиэһинэй – 287,3 туонна, эбиэс – 926, 80 туонна хомулунна. Аһаҕас уонна сабыылаах грунтан оҕуруот аһын ылыыга уопсайа 793 туонна хомулунна, былаан 107,1 бырыһыан туолла. Манна хаппыыста 359,6 туонна, моркуоп 64,22 туонна, сүбүөкүлэ 88,31 туонна, онтон атын оҕуруот аһа, о.д.а. барыта 107,9 туонна, хортуоппуй 1971,58 туонна хомуллан харайылынна.
Кыра кыамталаах эбийиэктэри тутуу республикатааҕы программатыгар сүүмэрдээһини ааһан, быйыл Бэрт Ууһугар, 1-кы Хороҕо, Дүпсүҥҥэ, 2-с Байаҕантайга, Өнөргө, Байаҕантайга 6 бааһынай хаһаайыстыба саҥа хотон тутунна уонна Лөгөйгө биир хаһаайыстыбаҕа өрөмүөн үлэтэ барда. Бэрт Ууһугар “Мэкэри” племенной хаһаайыстыбаҕа (сал. О.Г. Черкашин) убойнай пункт тутулла турар. Маны тэҥэ “Биэттэ Агро” (сал. В.В. Сивцев) хаһаайыстыбаҕа бэкээринэ, Дүпсүҥҥэ Д.В. Илларионов сиэмэ хаһаайыстыбатыгар 200 туонна кыамталаах зерносклад тутулунна. Байаҕантайга ИП КФХ М.Н. Готовцевка саҥа молокопровод тардыллан үлэҕэ киирдэ.
Бу курдук сайыҥҥы күннэри мүччү туппакка хаһаайыстыбалар үүт, от былаанын ситиһэргэ үлүмнэһэ үлэлээн, буоларын курдук, кыстыкка киириигэ бэлэм олороллор. Онон уһун кыһыммыт кэлэн, аны сааскыга диэри кыстык этэҥҥэ ааһарын туһугар аны үлэлэһиэхпит.
Екатерина Захарова