Балаҕан ыйын 3 күнүгэр Мүрү 1-гы №-дээх орто оскуолатыгар милитаристскай Японияны Кыайыы 80 сылын уонна иккис аан дойду сэриитин түмүктэммит күнүн итиэннэ Бойобуой Албан аат күнүн киэҥ далааһыннаахтык бэлиэтээтилэр.
Оскуола 8-10 кылаастарын оҕолоро аактабай сааланы толору муһуннулар. Тэрээһини улуустааҕы юнармия салайааччыта Мария Винокурова, “Биир кэлим Арассыыйа” олохтоох отделениетын сэкирэтээрэ Күннэй Рощина уонна оскуола иитэр үлэҕэ салайааччылара Михаил Охлопков, Мария Васильева салайан ыыттылар. Оскуолабыт “Мүрү” байыаннай-патриотическай кулуубун байыастара (хамандыыр Женя Бочкарев) Арассыыйа, Саха сирин уонна улууспут былаахтарын күөрэччи көтөҕөн киирдилэр. Уус Алдаҥҥа Кыайыы 80 сылыгар аналлаах “Юнармеецтар ааҕаллар” диэн хоһоон күрэһэр оскуолабыт 9 ”б” кылааһын уолаттара Ирган Васильев, Максим Татаров уонна Арсен Иванов “Жди меня” диэн Константин Симонов хоһоонун дорҕоонноохтук аахпыт видеоларын көрөн оҕолуун, улаханныын бары долгуйдулар. Бу күн дойду историятыгар туох суолталааҕын туһунан оскуола мусуойун үлэһитэ Елена Сыроватская хас биирдии оҕоҕо тиийэр гына олус итэҕэтиилээхтик кэпсээтэ.
Тэрээһиҥҥэ Уус Алдан улууһун баһылыгы социальнай боппуруостарга солбуйааччы Анатолий Сторожев, оскуолабыт дириэктэрэ Петр Баханов, юнармия улуустааҕы ыстаабын начаалынньыга, анал байыаннай дьайыы кыттыылааҕа, “Черный крест” хорсунун иһин орден уонна“ Бахмуту ылыы” иһин мэтээл хаһаайына Станислав Кириллин, улуустааҕы сокуоннай саастарын ситэ илик оҕолор дьыалаларын старшай инспектора Петр Степанов, Уус Алдан улууһун 34 №-дээх ОГПС баһаартан сэрэтэр отделын инструктора Иван Егоров сырыттылар, оҕолорго араас сүбэни биэрдилэр, ханнык да кэмҥэ олоххо бэлэмнээх киһи дойдутун көмүскүүрүн тоһоҕолоон эттилэр, үөрэҕи, спорду кытта дьүөрэлээн ситиһиилээх буолуҥ диэн ыҥырдылар.
Бүгүн, балаҕан ыйын 4 күнүгэр улууспут Мүрү 1-гы №-дээх, Мүрү 2-с №-дээх орто, Мүрүтээҕи уолаттар гимназияларын, Чараҥ, Өнөр орто оскуолаларыттан хомуллубут байыаннай-патриотическай кулууп чилиэннэрэ өрөспүүбүлүкэҕэ күрэхтэһэ бараллар. Тэрээһин кыттыылаахтара кинилэргэ ситиһиини баҕардылар. Тэрийээччилэр аан дойду иккис сэриитин туһунан боппуруостарга викторина ыыттылар. Ордук элбэх боппуруоска эппиэттээбит Арсен Протодьяконов (8 ”б”) киэҥ билиилээҕин көрдөрдө, табаарыстарын сөхтөрдө. Онтон 10 ”б” кылаас оҕолоро бастакыларын волонтердаатылар. Бүгүҥҥү ыытыллыбыт тэрээһинтэн оҕолор элбэҕи билэн тарҕастылар.
Мария Аммосова, уопсас. кэрэсп