Уус Алдаҥҥа Олег Александрович Винокуров прокурорунан ананан, үлэтин 2025 сыл балаҕан ыйын 1 күнүттэн саҕалаабыта. Кини улуус прокуратурата нэһилиэнньэни кытта бииргэ үлэлииргэ, олохтоохтор кыһалҕаларын быһаарарга күүс-көмө, сүбэ-ама буоларга бэлэмин иһитиннэрэр. Хаһыат бүгүҥҥү нүөмэригэр кинилиин сиһилии кэпсэтиини сэргээҥ.
– Олег Александрович, Уус Алдаҥҥа үлэҕэ ананыаҥ иннинэ ханна үлэлээбиккиний?
– Бу иннинэ Дьокуускай куорат прокуратуратыгар араас дуоһунастарга куорат прокурорун көмөлөһөөччүтүттэн саҕалаан куорат прокурорун старшай көмөлөһөөччүтүгэр тиийэ сулууспалаабытым. Онтон Саха Өрөспүүбүлүкэтин прокуратуратыгар холуобунай-суут салаатын прокурорун дуоһунаһыгар анаммытым. 2022 сылтан Дьокуускай куорат прокурорун солбуйааччытынан үлэлии сылдьыбытым итиэннэ судаарыстыбаннай буруйдааччылар үлэлэрин салайбытым, ону тэҥэ федеральнай сокуон толоруллуутун надзоругар үлэлээбитим.
– Бу идэни туох санааттан талбыккыный? Ханна үөрэммиккиний?
– 2010 сыллаахха М.К. Аммосов аатынан Хотугулуу-Илиҥҥи федеральнай университет юридическай факультетын бүтэрбитим. Прокурор идэтин таларбар дьоҥҥо көмөлөһөр баҕа санаам төрүөт буолбута. Тоҕо диэтэххэ, прокуратура үлэтин сүрүнэ – киһи быраабын көмүскээһин.
– Эн үлэҕэр саамай сүрүн хаачыстыба туохха дии саныыгыный?
– Олохтоохтор кыһалҕаларыгар болҕомтолоох буолуу, тахсар быһыыга-майгыга тута реакциялааһын, аһаҕас буолуу. Итиэннэ үлэни сөптөөхтүк былааннааһын, тэрийии баар буоллаҕына, барыта сатанар диэн санаалаахпын.
– Тус прокурор үлэтэ уратыта тугуй?
– Биллэн турар, сир-сир аайы үлэ араастаһар. Улуус прокурорун үлэтэ интэриэһинэй уонна элбэх хайысхалаах. Дьиэ-уот хомунаалынай хаһаайыстыбатын боппуруостарыгар, хаачыстыбалаах иһэр уунан хааччыллыыга, дьону хаарбах дьиэттэн көһөрүүгэ, суол фондатын сөптөөх туругар, социальнай уонна үөрэх тэрилтэлэригэр баһаар куттала суоһаабатын туһугар элбэх үлэ ыытыллыаҕа. Маныаха туһааннаах тэрилтэни кытта биир ситимнээх үлэни ыытыам. Бу сыл устата бары нэһилиэктэргэ сылдьан баар кыһалҕаны билсэн, ону туоратар соруктаахпын.
– Уус Алдаҥҥа үлэҕэ анаммыккар дьиэ кэргэниҥ сыһыана?
– Манна анаммыппар дьиэ кэргэним өйөөбүтэ. Хайа даҕаны үлэҕэ ананарбар, саҥа саҕалааһыммар кэргэним өйүү өйүүр, онон киниэхэ улаханнык махтанабын.
– Биһиги улууспутугар буруй-сэмэ төһө тахсар эбитий? Ордук ханнык көрүҥнээх буруй тахсар эбитий?
– Ордук эт-хаан эчэйиитигэр, итирик суоппар массыынаны ыытара (эрдэ административнай уонна холуобунай эппиэтинэскэ тардыллыбыт киһи хат түбэһиитэ), уоруу араас көрүҥэ бэлиэтэнэр.
Төлөпүөн нөҥүө албын-көлдьүн быһыы тахса турарынан, түгэни туһанан улуус олохтоохторун сэрэхтээх буоларга ыҥырабын. Быйыл сыл саҕаланыаҕыттан номнуо 111 тыһ. уонна 235 тыһ. сууманы уордарыы түгэнэ таҕыста. Араас сыылканан киирэртэн туттунуҥ, кредити онлайн ылыыга бобуута (самозапрет) туруоруҥ итиэннэ саарбах нүөмэртэн эрийэр түгэннэригэр төлөпүөнү ылымаҥ диэн этиэм этэ.
– Иллэҥ кэмҥэр тугунан дьарыктанаҕыный?
– Прокурор үлэтиттэн ордор кыра бириэмэбин чугас дьоммор, дьиэ кэргэммэр аныы сатыыбын. Түгэн көһүннэҕинэ кинигэ ааҕарбын, спордунан дьарыктанарбын, айылҕаҕа сылдьарбын ордоробун, саҥаны билэ-көрө, бэйэни сайыннара сатыыбын.
– Улуус олохтоохторугар тугу этиэҥ этэй?
– Кэлэн иһэр бырааһынньыгынан улуус кэрэ аҥаардарын эҕэрдэлиибин! Чугас дьоҥҥут этэҥҥэ сырыттыннар.
Улуус олохтоохторун сокуону кэспэккитигэр ыҥырабын. Өскөтүн, эһиги быраапкыт хайа эмит өттүнэн күөмчүлэнэр, сиэрэ суох быһыы тахсар түгэнигэр, үлэ бириэмэтигэр улуустааҕы прокуратураҕа кэлэн, тус приемҥа миэхэ эбэтэр солбуйааччыбар, көмөлөһөөччүбэр тиэрдиэххитин сөп. Бары доруобай буолуҥ!
Наталья Попова