От ыйын 11-12 күннэригэр Мордовияҕа “Идэтигэр бастыҥ” диэн бүтүн Россиятааҕы куонкурус федеральнай түһүмэҕэр биир дойдулаахпыт, Баатаҕай нэһилиэгин “Биэттэ-агро” хааччахтаммыт эппиэтинэстээх тэрилтэ кылаабынай агронома Василий Сивцев кыттан, бастыҥнар ортолоругар ааттанна.
Эдэр агроном бэйэлэрин идэлэрин толору баһылаабыт киэҥ Россия 15 регионуттан кыттыбыт уопуттаах маастардар ортолоругар төрдүс миэстэни ылбыта барыбытын үөрдэр. Тыйыс тымныылаах хоту эргимтэҕэ сытар ыраах Саха сиригэр бааһынатыгар бурдук араас суордун олордон, норуот хаһаайыстыбатыгар туһаҕа таһаарыы бэйэтэ үрдүк ситиһии буоллаҕа. Мордовия уобалаһын Кочкуровскай уонна Ичалковскай оройуоннарыгар ыытыллыбыт күрэскэ агрономнар идэлэрин таһымын теория тестэригэр, ыһыы аналиһын оҥорууга, сиэмэ хаачыстыбатын быһаарыыга, сир үлэтигэр сыһыаннарыгар билиилэрин, маастарыстыбаларын тургуттулар. Биир дойдулаахпыт күрэс туһунан маннык санаалаах:
— Маннык үрдүк таһымнаах куонкуруска кыттыы, тус бэйэҥ билиигин эрэ бэрэбиэркэлээһин буолбатах, сүрүнэ – Россия араас муннуктарыттан кыттыыны ыла кэлбит бастыҥ биир идэлээхтэргин кытта уопут атастаһыыта. Бэйэм төрөөбүт Сахам сирин агрономиятын федеральнай таһымҥа көмүскээбитим улахан чиэс диэн сыаналыыбын.
Василий Васильевич агроном идэтигэр эһэтиттэн, аҕатыттан уһуйуллан утуму салҕыыр эдэр үлэһит. Дьокуускайдааҕы Тыа хаһаайыстыбатын Академиятын Землеустройство уонна ойуур хаһаайыстыбатын факультетын бүтэрэн, агроном идэтин 2024 сыллахха баһылаан баран, билигин магистратураҕа үөрэҕин салгыы сылдьар.
Биэттэ өҥ сиригэр быйыл 624 гааҕа эбиэс, сэлиэһинэй, кыстыыр оруос ыһылынна. Василий уол чугас дьонун салалтатынан ыһыы үлэтигэр кыра эрдэҕиттэн сыстан, билигин идэ оҥостон, бүтүн Россия таһымыгар аатын ааттатан, идэтин сөбүлээн үрдүк үрдэлгэ тахсыбыта туоһулуур.
Светлана Сивцева