Бүгүн улуус дьаһалтатыгар анал байыаннай дьайыы кыттыылаахтарын төрөппүттэрин кытта көрүстүлэр. Көрсүһүүгэ кэлбит төрөппүттэр улуус дьаһалтатын өттүттэн маннык сирэй көрсөн, баар кыһалҕаны быһаарсыы өтөрүнэн буолбатаҕын бэлиэтээтилэр. Нэһилиэктэринэн олохтоох дьаһалталар анал байыаннай дьайыы кыттыылаахтарын дьиэ кэргэттэригэр көмөнү миэстэтигэр тиһигин быспакка оҥороллорун иһитиннэрдилэр.
Сүрүн кыһалҕа олохторун толук уурбут уолаттар докумуоннарын ситиһиигэ үгүс ыарахаттары көрсөллөрүн, военкомат үлэтэ мөлтөҕүн, ол түмүгэр сорох уолаттар докумуоннара, наҕараадалара күн бүгүнүгэр диэри көстө илигин, инникитин манна болҕомто ууран, военкоматы кытта биир ситимнээх үлэни ыыталларыгар туруорустулар.
Хорсун байыастар ааттарын үйэтитиигэ улуус киинигэр анал сквер тутуллуутугар, уолаттар ааттарынан күрэхтэһиилэри тэрийэн ыытыыга этиилэри киллэрдилэр, итиэннэ ититии ситимигэр кыайан холбоно илик дьиэ кэргэттэргэ көмөнү оҥоһулларыгар, үлэ миэстэтин булууга өйөбүл буолалларыгар санааларын үллэһиннилэр.
Түмүгэр улуус дьаһалтатыгар, чуолаан баһылык Василий Алексеевка бу маннык болҕомто ууран, ыҥыран кэпсэтэн, санааларын аһаҕастык этэллэрин истибиттэригэр махталларын тиэртилэр.
Василий Петрович инникитин даҕаны маннык көрсүһүүлэр баар буолуохтара диэн эрэннэрдэ. Туох кыһалҕалаахтарын тутатына этэн, тиэрдэн иһэллэригэр, ону учуокка ылан туоратыыга өрүү бастакы уочаракка сылдьалларын тоһоҕолоон эттэ.
Улуус дьаһалтатын пресс-сулууспата