Алтынньы 18 күнүгэр Саха сирин Ийэлэрин күнэ бэлиэтэнэр. Биһиги томороон тымныылаах Сахабыт сирин ийэлэрэ айылҕаттан ураты суоллаах-иистээх, киэҥ-холку көҕүстээх, күүстээх санаалаах, дэгиттэр талааннаах, сатабыллаах, үлэни өрө туппут ийэлэр буоллахтара.
Улууспут киинигэр үлэлиир Валентина Шадрина салайааччылаах «Дьол уйата» түмсүү – инники этиибэр үтүө холобур! Бу биэстэн элбэх оҕолоох ийэлэр түмсүүлэрэ буолар. Түмсүү тэриллибитэ быйыл 10 сыла.
Бу уон сыл устата элбэх кыра оҕолоох ийэлэр нэһилиэккэ ыытыллар бары ырааһырдыы субуотунньуктарыгар, мас олордуутугар, аахсыйаларга, тэрээһиннэргэ көхтөөхтүк кыттан кэллилэр. Ону таһынан байыаннай дьайыы кыттыылаахтарын дьиэ кэргэттэригэр муус ылыытыгар уонна мас кэрдиитигэр эр дьон субуотунньугар итии аһылыгы тэрийээччилэр – эмиэ кинилэр. Ону сэргэ Кыайыы 75 сылыгар анаабыт бырайыактарын чэрчитинэн «Минньигэс бөрүөк» диэн аахсыйаны тэрийэн, түмсүү чилиэттэрэ бурдук аһы астаан, Кыайыы күнүн ахсын сэрии, тыыл бэтэрээннэрин күндүлүүллэр.
Түмсүү хайдах тэриллибитин туһунан Валентина Николаевна маннык кэпсиир:
– Түмсүү 2016 сыл алтынньы 15-16 күннэригэр тэриллибитэ. Оччолорго «Алаас хотуна» түмсүү дьахталлара элбэх оҕолоох ыаллары дьиэлэринэн кэрийэн, нэһилиэк баһылыга Василий Аммосов эҕэрдэ суругун туттарар этибит. Онно түмсүүбүт иһинэн сүбэлэһэн баран, биэстэн элбэх оҕолоох ийэлэри мунньан түмсүү тэрийбиппит. Бастакы тэрээһиннэрбитинэн балаҕаҥҥа араас социальнай тэрилтэ исписэлиистэрин, уйулҕа үөрэхтээхтэрин кытта көрүһүннэрэн, мунаарар ыйытыыларыгар хоруйу ылалларын тэрийбиппит. Итиэннэ Майаҕа тиийэн, «Сырдык сыдьаай» диэн итэҕэл, сиэр-туом түмсүүтүн кытта көрсүһүү оҥорбуппут. Ити кэмнэртэн билсэн, түмсэн көхтөөх үлэбит саҕаламмыта. «Дьол уйатыгар» саамай аҕыйаабыта биэс оҕолоох ийэлэр бааллар, олор истэригэр 2017 сыллаахха Герой Ийэ аатын ылбыт Виктория Васильева, сэттэ оҕолоох Жанна Домотова, Наталья Турантаева, алта оҕолоох Кристина Бочкарева, Варвара Кривошапкина курдук ийэлэр оҕолорун, дьиэ кэргэннэрин кытта үлэлэһэн кэллибит. Холобур, биир кэми санаатахха, хамсык бириэмэтигэр «Алаас хотуна» түмсүү дьахталлара ийэлэрбит дьиэ кэргэттэрин сэргэхситэр сыаллаах дьиэлэригэр тиийэн араас тургутуктары, оонньуулары тэрийэр, оҕолор музыкальнай нүөмэрдэрин көрөр этибит.
Бу санаан көрдөххө, этэргэ дылы, уу кырбас сыры-сыллатааҕы оҕолоох ыал ийэлэрэ күн бүгүн бары дьоһун ыал мааны ийэлэрэ, далбар хотуттара буолан олороллоруттан биир бэйэм үөрэбин, киэн туттабын! Бу уон сыл устата үтүө түмүктээхтик, көдьүүстээхтик үлэлээн кэлбит түмсүүбүт 10 сылын бэлиэтиир санаалаахпыт.
Бачча сыллар тухары нэһилиэкпит, улууспут сайдыытын уонна бигэ туруктаах буолуутун иннигэр уопсастыбаннай үлэҕэ ыллыктаах санааларын, ийэлии кыһамньыларын, сыраларын, бириэмэлэрин ууран кэлбит түмсүүбүтүн 10 сылларынан эҕэрдэлиибит!
Мария Аргунова