Бэҕэһээттэн илин эҥэр уонна киин улуустар баһаарынай сулууспаларын икки ардыларыгар XXII төгүлүн ыытыллар спартакиадата Бороҕон сэлиэнньэтигэр «Майаҕатта Бэрт Хара» стадиоҥҥа буола турар. Күрэскэ аҕыс хамаанда хомуллан кэлбит: Амма, Таатта, Чурапчы, Нам, Хаҥалас, Мэҥэ Хаҥалас, Дьокуускай уонна Уус Алдан.
Спартакиадаҕа хамаандалар баһаарынай сулууспа үлэтигэр сыһыаннаах 10 көрүҥҥэ күөн көрсөллөр, үс бастаабыт хамаанда балаҕан ыйыгар өрөспүүбүлүкэтээҕи спартакиадаҕа Бүлүү бөлөх улуустарыттан сүүмэрдэммит хамаандалары кытары күрэхтэһиэхтэрэ.
Спартакиада үөрүүлээх арыллыыта бүгүн буолла. Бэлиэ түгэҥҥэ «Уус Алдан улууһун социальнай-экономическай сайдыытыгар кылаатын иһин» анал бэлиэни Владимир Орловка, «Килбиэннээх үлэтин иһин» анал бэлиэни Василий Сивцевкэ, бочуотунай грамоталары Евгений Свинобоевка, Николай Бурнашевка, махтал суруктары Николай Павловка, Олег Заболоцкайга, Игорь Бурнашевка, Алексей Рожиҥҥа туттартаатылар.
«Мүрү нэһилиэгин бочуоттаах олохтооҕо» анал ааты Василий Мырсановка иҥэрдилэр. “Нэһилиэнньэ баһаартан сэрэхтээх буолуутугар кылаатын иһин” анал бэлиэлэри Семен Бурнашевка, Егор Замятиҥҥа, Иннокентий Ушницкайга, “Туйгун көрдөрүү иһин” мэтээли Анисим Охлопковка, «Баһаары сэрэтэр сулууспа туйгуна» анал ааты Игорь Петуховка туттардылар, бочуотунай грамотанан Василий Гаврильев, Иван Данилов, махтал суругунан Арсен Тимофеев наҕараадаланнылар.
Михаил Гаврильев, спартакиада судьуйата:
– Хамаандалар бары кыайарга дьулуурдаахтар, сылын аайы ханнык хамаанда кыайара биллибэт, ол иһин күрэс бүтэһигэр диэри кыттааччылар кыайыыга эрэллээх киирсэллэр. Спартакиада баһаарынай сулууспа үлэтин көрүҥнэригэр майгынныыр, спортивнай көрүҥ суох, ол эрээри кыттааччылар толору профессиональнай сатабылларын, физическэй кыахтарын тургутан көрүөхтэрэ.
Анатолий Кириллин