Бүгүн Бороҕоҥҥо улуус дьаһалтатын улахан саалатыгар РФ Госдууматын тохсус ыҥырыытын депутаттарын талар быыбар тэрээһиннээхтик ыытарга анаан Уус Алданнааҕы Территориальнай быыбар хамыыһыйатын уонна быыбар учаастактааҕы хамыыһыйаларын чилиэннэрэ кыттыылаах сэминээр-мунньахха Дьокуускайтан Саха Өрөспүүбүлүкэтин Быыбар киин хамыыһыйатын бэрэссэдээтэлин солбуйааччы Иван Андросов, СӨ Быыбар киин хамыыһыйатын чилиэннэрэ Евгений Рябченко, Нарыйа Иванова кытыннылар.
Мунньахха балаҕан ыйын 18-19-20 күннэригэр ыытыллар Биир кэлим быыбардыыр күҥҥэ бэлэмнэнии хаамыытын туһунан СӨ Быыбар киин хамыыһыйатын бэрэссэдээтэлин солбуйааччы Иван Андросов иһитиннэрдэ. Быыбардааччылар испииһэктэрин оҥоруу, чуолкайдааһын, туһаныы туһунан Уус Алданнааҕы Территориальнай быыбардыыр хамыыһыйа бэрэссэдээтэлэ Александра Аянитова, “Мобильный избиратель” диэн көрүҥүнэн куоластааһыҥҥа испииһэккэ киирии бэрээдэгин уонна куоластыыр сиртэн таһынан куоластааһыҥҥа сайабылыанньаны биэрии уратыларын туһунан СӨ Быыбар киин хамыыһыйатын чилиэнэ Евгений Рябченко билиһиннэрдилэр. СӨ Быыбар киин хамыыһыйатын быраап өттүнэн хааччыллыытын уонна хонтуруолун салаатын салайаччыта Нарыйа Иванова быыбары кэтээн көрөөччүлэр испииһэктэрин кытта үлэни, быыбар агитациятын уратытын, киирэр сайабылыанньалары кытта үлэ туһунан сырдатта.
Итиэннэ 36 учаастактааҕы хамыыһыйа бэрэссэдээтэллэрэ, бэрэссэдээтэли солбуйааччылара, сэкирэтээрдэрэ быыбар күн видеонан кэтэбили туһаныы, быыбардыыр учаастактары анал тэриллэринэн хааччыллыы, быыбар учаастактааҕы хамыыһыйалара иһитиннэрэр-быһаарар үлэлэрин туһунан наадалаах иһитиннэриилэри болҕойон иһиттилэр.
Светлана Сивцева