Ааспыт сыл сэтинньитигэр Мүрү нэһилиэгэр сааһырбыт дьоҥҥо аналлаах «Сэргэх олох» кулууп урукку мусуой дьиэтин балаҕаныгар аанын тэлэччи арыйбыта. Бу кулууп салайааччытынан Павел Аммосов биир төлөбүрэ суох, этэргэ дылы, сүрэх баҕатынан үлэлиир.
Өр сылларга үлэ үөһүгэр сылдьыбыт киһи бочуоттаах сынньалаҥҥа тахсан, дьиэтигэр олорон соҕотохсуйдаҕына, уопсастыба олоҕуттан тэйдэҕинэ түргэнник кырдьар, кэхтэр диэн санааттан, улууспут актыбыыс бэтэрээнэ Варвара Новогодина маннык кулуубу арыйарга тыл көтөхпүтүн Мүрү нэһилиэгин уонна улуус дьаһалталара өйөөннөр, дьиэ-уот биэрэн, ыытар тэрээһиннэригэр көмө-тирэх буолаллар.
«Сэргэх олох» кулууп улууспут түмсүүлэрин, социальнай хайысхалаах, о.д.а. тэрилтэлэри кытта биир ситимнээхтик үлэлиир, бииртэн-биир чаҕылхай тэрээһин ыытыллар. Холобурдаан эттэххэ, Мүрүтээҕи Үһүс саас оскуолатын волонтер-педагогтара нэдиэлэ ахсын араас маастар кылаастары тэрийэн үөрэтэллэр. Ону таһынан кулууп чилиэннэрэ улуустааҕы пенсионнай управлениеттан, нэһилиэнньэ социальнай көмүскэлин кэлим кииниттэн, уйулҕа кииниттэн, доруобуйа харыстабылын тэрилтэтиттэн, кииннэммит бибилэтиэкэттэн информационнай көмөнү ылаллар, араас аралдьытар, билиини биэрэр, өйү-санааны эрчийэр тэрээһиннэргэ сэргэхсийэллэр уонна бэйэ-бэйэлэрин кытта алтыһан, улуус, нэһилиэк олоҕор көхтөөхтүк кытталлар.
Онон ааттыын сэргэх кулуупка 50-тан тахсыбыт саастаах дьон күнтэн-күн талаһан, эбиллэн иһэллэрэ кулууп салайааччытын, кыттааччыларын үөрдэр.
Мария Аргунова