Бу күннэргэ Ойуунускай аатынан Саха драматическай тыйаатыра Бороҕоҥҥо гастроллуу кэлэн, улуус олоҕор сэргэхсийиини таһаарда.
Тыйаатыр 36 үлэһитэ, сүрүн састаап олоччу кэриэтэ кэлэннэр, Николай Якутскай «Төлкө», Амма Аччыгыйа «Сааскы кэм» курдук саха литэрэтиирэтин бөдөҥ айымньыларынан уонна оҕолорго анаан Николай Лугинов «Кустук» сэһэнинэн испэктээктэри көрдөрдүлэр.
Муус устар 1 күнүгэр улуустааҕы киин бибилэтиэкэ саалатыгар сахалыы таҥныбыт Саха тыйаатырын артыыстара көрсүһүүгэ кэлбит дьон утары олорбуттара хара ааныттан ураты тыыны биэрдэ.
Тыйаатыр артыыстара режиссердарын, СӨ искусствотын үтүөлээх деятелэ, Найахыттан төрүттээх Василий Фомины ахтан ааһаары, санааларын үллэстээри күндү ыалдьыт буоллулар. Көрсүһүүнү тыйаатыр талааннаах артыыската Татьяна Легантьева хомоҕой тылынан салайан ыытта. СӨ үтүөлээх артыыһа, РФ Судаарыстыбаннай бириэмийэтин лауреата Иннокентий Луковцев ахтыы чааһы кылгас киирии тылынан аспытын кэннэ Найахы нэһилиэгин бэтэрээннэрин сэбиэтин бэрэссэдээтэлэ Светлана Петрова, В.М. Фомин аймаҕа Бороҕонтон Мария Егоровна Фомина, Өнөртөн бииргэ үөрэммит үөлээннээҕэ Анисия Ивановна Ушницкая Василий Михайлович оҕо, эдэр сааһын туһунан кэпсээтилэр. Көрсүһүүгэ Василий Михайлович чугас быраатын сиэннэрэ кэлэн истэн олорбуттара көлүөнэ ситимэ быстыбатын туоһута буолла.
Саха тыйаатырын артыыстара: СӨ үтүөлээх уонна народнай артыыһа Зоя Багынанова, СӨ үтүөлээх артыыстара Зоя Попова, Маргарита Борисова, СӨ, РФ үтүөлээх артыыһа Елена Сергеева — Румянцева, СӨ үтүөлээх артыыстара Надежда Ушницкая, Кирилл Семенов, СӨ үтүөлээх уонна народнай артыыстара Домна Уйгурова, Куприян Михайлов интэриэһинэй ахтыылары оҥордулар. Улуустааҕы бибилэтиэкэ үлэһиттэрэ Надежда Гоголева, Мария Заболоцкая, култуура үлэһитэ Марианна Бережнева Василий Фомиҥҥа ХИФУ-га үөрэнэ сылдьан уһуйуллубуттарын, култуура бэтэрээнэ Мария Копырина В.В. Никифоров-Күлүмнүүр төрөөбүтэ 140 сылыгар аналлаах улуустааҕы ыһыах сценарийыгар Василий Фомины кытта тэҥҥэ үлэлэспитин, Василий Парников Найахы курдук ырыаны, тойугу өрө тутар нэһилиэктэн үүнэн-сайдан тахсан оҕону ырыаҕа уһуйа сылдьарын билиһиннэрдэ, бибилэтиэкэ улуустааҕы тиһигин бочуоттаах дириэктэрэ Варвара Окоемова, дириэктэр Лена Павлова тыл эттилэр. Ахтыы кэмигэр хоһоон да ааҕылынна, ырыа да ылланна.
Аны икки сылынан В.М. Фомин төрөөбүтэ 90 сыла туоларынан, бүгүҥҥү тэрээһин онно бэлэмнэниигэ бастакы үктэл буолла диэн бэлиэтээтилэр. Найахы нэһилиэгин баһылыга Петр Слепцов биир дойдулаахтарын үйэтитиигэ үлэлэһиэхпит диэн эрэллээх этиитинэн истиҥ ахтыы чааһа түмүктэннэ.
Елена Сыроватская, уопсас. кэрэсп.