Бүгүн улууспутугар анал байыаннай дьайыыга сырдык тыыннарын толук уурбут буойуттар дьиэ кэргэттэригэр аналлаах көрсүһүү буолла. Ол курдук республикаҕа «Быть воином – жить вечно» диэн уопсастыбаннай хамсааһын бэрэссэдээтэлэ Владислав Диодоров-Лаврентьев, кини кэргэнэ СӨ Ил Дарханын уонна Бырабыытылыстыбатын Секретариатын сүрүннүүр референа Светлана Диодорова-Лаврентьева баара-суоҕа 24 саастаах уоллара байыаннай дьайыыга сырдык тыына быстан, бэйэлэрин курдук сүтүктээх, кыһалҕалаах дьону өйдөөн-өйөөн ис баҕаларынан күүс-көмө буолан, бу көрсүһүүнү тэрийдилэр.
Ону тэҥэ кэпсэтиигэ улуус баһылыгын солбуйааччы Алексей Тарасов, байыаннай дьайыы кыттыылаахтарын өйүүр «Защитники Отечества» государственнай фонда сүрүннүүр социальнай координатора Надежда Иннокентьева, улууска социальнай координатор Кюннэй Оконешникова, кини көмөлөһөөччүтэ Алексей Кириллов, Уус Алданнааҕы нэһилиэнньэ социальнай көмүскэлин кэлим киинин салайааччытын солбуйааччы Сеанна Сивцева, сүрүннүүр исписэлиис Ирина Беркина кытыннылар.
Кинилэр байыаннай дьайыы кыттыылаахтарын ийэлэригэр, кэргэттэригэр туһааннаах боппуруостарыгар хоруйдаатылар, үгүс ыйыы-кэрдии, сүбэ-ама биэрдилэр. Оттон Владислав Алексеевич эр дьону туспа кэпсэтиигэ ыҥыран, республикаҕа «Быть воином – жить вечно» байыаннай дьайыыга сырдык тыыннара быстыбыт байыастар аҕаларын уопсастыбаннай хамсааһыннарын тэрийбитин туһунан сырдатта. Итинник соруктаах кини Сахабыт сирин улуустарын кэрийэн туох сыаллаах түмсэн эрэллэрин туһунан билиһиннэрэ, улууска хамсааһын салаатын төрүттүү сылдьарын туһунан эттэ. Биир балаһыанньалаах эр дьон бэйэ-бэйэни билсэн-көрсөн, туһааннаах боппуруостарга сүбэлэһэн-амалаһан, хардарыта өйөнсөн, олох салҕанар бэлиэтэ ыччаты, сиэннэри салгыы иитиигэ сүбэ булан, уопсастыбаҕа күүс-өйөбүл буолар уонна дойдуларын туһугар олохторун толук уурбут уолаттар сырдык аатттарын үйэтитэр сыллаах буолар диэн кэпсээтэ.
Инникитин НКО тэринэн байыаннай дьайыы кыттыылаахтарын өйүүр, сырдык тыыннарын толук уурбут байыастар ааттарын үйэтитэргэ граҥҥа киирсэн, араас бырайыактары олоххо килэрэр ыра санаалаахтар. Онуоха биһиги улууспут аҕалара сөптөөх хамсааһын тэриллэн эрэрин сэргээтилэр уонна хамсааһыҥҥа киирэн үлэлэһэргэ бэлэмнэрин эттилэр. Тута түмүллэн, бу хамсааһын Уус Алданнааҕы салаатын бэрэссэдээтэлинэн II Байаҕантай нэһилиэгин олохтооҕо Ариан Саввины эрэнэн таллылар.
Мария АРГУНОВА