Оскуолаҕа киириэн иннинээҕи саастаах оҕолорго Бүтүн Арассыыйатааҕы “Орлята дошколята” федеральнай бырайыак Саха сиринээҕи «Өксөкү сиэннэрэ. Чычып-чаап» бырагыраамата бу үөрэх дьылыттан киирдэ. Координатор “Росдетцентр” федеральнай государственнай тэрилтэ “Оҕо саас сирдьиттэрэ” (“Навигаторы детства”) регионнааҕы тирэх киинэ, салайааччы Нюргуяна Владимировна Макарова.
Иитэр үлэҕэ дириэктэр сүбэһиттэрэ нэһилиэктэргэ үлэни салайан саҕалаатылар. Тирэх киининэн улууска уһуйааннарга «Мүрүчээнэ» оҕо саада буолар, оскуолаларга – Г.В. Егоров аатынан Мүрү 1№-дээх орто оскуолата.
Үлэбит кэккэ ситиһиилэрдээх. Ол курдук, уһуйаан иитээччилэрэ быйыл региоҥҥа үстэ идэ таһымын куурустарыгар сырыттылар, «оҕо саада – оскуола» форматтаах араас хабааннаах тэрээһиннэр ыытыллаллар.
Кулун тутар 27-28 күннэригэр 300-чэкэ кыттааччыны “Өксөкү сиэнэ – историяны харыстыыр” («Орленок – хранитель исторической памяти») Регионнар икки ардыларынааҕы III научнай-практическай конференция буолла. Манна Сахабыт сирин 20 улууһун таһынан Карелия Өрөспүүбүлүкэтин, Волгоград, Смоленскай, Москуба уонна Омскай уобаластар кыттыыны ыллылар.
Тэрээһин үрдүк экспертнэй таһымын М.К. Аммосов аатынан Хотугулуу-Илиҥҥи Федеральнай университет, гуманитарнай чинчийии институтун уонна профессиональнай педагогическай уопсастыба специалистара хааччыйдылар. Учуонайдар уонна практиктар бииргэ үлэлээһиннэрэ уопут атастаһыыга уонна бэриллибит көҕүлээһиннэри профессиональнай сыаналааһыҥҥа таһаарыылаах эйгэни тэрийэргэ кыах биэрдэ.
Биһиги улуустан Лөгөй лицей-интерната, Бэйдиҥэ, Бээрийэ, Орто Эбэ, Тулуна уонна Тиит Арыы оскуолалара кытыннылар.
Уһуйааннартан Курбуһах нэһилиэгин «Чуораанчык» оҕо саадын иитиллээччитэ Уйгулаана Винокурова бу кэмпириэссийэҕэ III истиэпэннээх лауреат ааты ылары ситистэ.
Салайааччыта Ольга Бурнашева, иитэр үлэҕэ дириэктэр сүбэһитэ Матрена Васильева. Уйгулаананы истиҥник эҕэрдэлиибит, бастакы дьоһун ситиһиитин бу күн төрөөбүт күнүн, 5 сааһын бэлиэтээбит балтытыгар Алгыстаанаҕа анаабыта чугас дьонун олус үөртэ.
Мария Винокурова, «Оҕо саас сирдьиттэрин» улуустааҕы координатора