Талааннаах суруналыыс Ольга Шепелева аатынан Уус Алдан оскуолаларын үөрэнээччилэрин ортолоругар «Ийэ туһунан иһирэхтик» («Слово о матери”) эдэр кэрэспэдьиэннэр күрэстэригэр аҕыс оскуолаттан барыта 37 үлэ киирдэ. Оҕо төрөөбүт тылынан суруйар дьоҕурун арыйар, ийэ суолтатын үрдэтэр, Ольга Шепелева сырдык аатын үйэтитэр сыаллаах күрэспитигэр кыһамньыларын ууран үөрэнээччилэрин кытыннарбыт Мүрү 1-кы уонна 2-с №-дээх, Курбуһах, Тулуна, Лөгөй, Тиит Арыы, Бэйдиҥэ, Уһун Күөл оскуолаларыгар махталбытын тиэрдэбит. Ордук Бэйдиҥэ орто оскуолата, Лөгөй лиссиэй-интэринээт, Уһун Күөл оскуолата элбэх оҕону кытыннарбытын бэлиэтиибит.
Өйтөн суруйуу киэбинэн суруллубут ыстатыйалар уонна хоһооннор киирдилэр. Хас биирдии үлэ ийэҕэ махталынан, ис сүрэхтэн суруллубут, онон сыаналыырга да, бэрт уустук буолла. Сонун, ураты этиилэрдээх үлэлэри сыныйан, кыайыылаахтары маннык быһаардыбыт: бастакы миэстэ – Лөгөй лиссиэй-интэринээт 9-с кылааһын үөрэнээччитэ Павел Герасимов (сал. Валентина Тищенко, Любовь Петухова). Павел «Хатыҥ буолбут ийэкээм…» диэн 10 күпүлүөттэн турар хоһоону суруйбут. Хоһооҥҥо ааптар чыычаах буолан хатыҥҥа сылаастык уйаланан олорор. Хатыҥ чыычааҕы тыалтан-самыыртан хаххаллаан, көрөн-истэн бүөбэйдээн улаатыннарын ийэтигэр холоон суруйбут. Сорох строкалары ис хоһоонун чопчулаан биэрдэҕинэ чахчы үчүгэй айымньы тахсыыһы. Онон хоһоон курдук уустук көрүҥү Павел толору баһылыан сөп эбит диэн сыаналаатыбыт.
Иккис миэстэ – И.С. Колодезников аатынан Тиит Арыы сүрүн оскуолатын 8-с кылааһын үөрэнээччитэ Юлия Аргунова (сал.Эльвира Павлова). Юлия «Дьоллоох ийэ – дьоллоох дьиэ кэргэн» 11 оҕоҕо күн сирин көрдөрбүт СӨ Герой ийэтэ ааты ылбыт ийэтин туһунан бэрт үчүгэйдик, сиһилии суруйбут. Улахан дьиэ кэргэн олоҕо-дьаһаҕа ийэттэн тутулуктааҕын, ол иһин ийэлэрин куруук үөрдэргэ кыһаллалларын туһунан сөптөөх санааларын эппит.
Үһүс миэстэ – Н.Н.Окоевмов аатынан Курбуһах орто оскуолатын 11-с кылааһын үөрэнээччитэ Максим Наумов (сал. Матрена Васильева). Максим «Ийэ аан дойдуга саамай күндү тыл» диэн суругар ийэ диэн кылгас тыл төһөлөөх күүстээх суолталаах өйдөбүлү тутан турарын сөҕө-махтайан, дьүһүйэн суруйар. Үксүгэр оҕо дьон ийэ тапталын буолуохтааҕын курдук ылынарын билинэн, ийэҕэ куруук тапталы этэргэ, махтана сылдьарга ыҥырар. Максим бу дьоҕус суругар үгүс бэргэн этиилэри булуохха сөп.
Эппиппит курдук, ис сүрэхтэн суруллубут, үчүгэй үлэ элбэх. Онон кыайыылаахтары таһынан анал бириистэр олохтоннулар. Редакция анал бирииһинг Уһун-Күөл орто оскуолатын 10-с кылааһын үөрэнээччитэ Иван Афанасьевка (сал. Сардаана Жиркова) анаатыбыт. Иван «Ийэ» диэн хоһоонугар ийэ хараҕын күҥҥэ, куолаһын сылаас тыалга, суһуоҕун өрүс долгуннарыгар тэҥнээн истиҥ-иһирэх хоһоону суруйбут.
Оттон хаһыаппыт сүрүн кэрэспэдьиэнэ Афанасий Копырин икки оҕоҕо бириис олохтоото. Ол курдук Афанасий Иванович биир бирииһин А.Н.Жирков аатынан Бэйдиҥэ орто оскуолатын 2-с кылааһын үөрэнээччитэ Эрсан Корякиҥҥа (сал. Ирина Алексеева) туттарда. Эрсан «Ийэм кэрэтэ» хоһоонугар хайа да оҕо ийэтэ суох табыллыбатын, куруук ийэтин көмөтүгэр наадыйарын туһунан бэрт истиҥник, оҕолуу суруйбут.
Афанасий Иванович иккис бирииһин Курбуһах орто оскуолатын 2-с кылааһын үөрэнээччитэ Чаҕыл Васильевка (сал. Матрена Васильева) анаата. Чаҕыл дьоҕус суругар идэтин уонна оҕолору олус таптыыр учуутал ийэтин туһунан бэрт чопчутук хоһуйбут.
Бары кыттыбыт оҕолорго махталбытын тиэрдэбит. “Мүрү саһарҕата” улуускут хаһыатыгар куруук суруйа туруҥ диэн ыҥырабыт!
Мария АРГУНОВА