Килбиэннээх үлэ эстафетата бүгүн Сыырдаахха тохтоото. Үлэ Дьоруойа Михаил Готовцев көрсүбүт, сэлэспит сирин аайы Чирэпчи туһунан олус истиҥник аҕынна. Уопсайынан, Михаил Николаевич дьоруой ыанньыксыт эрэ буолбатах, элбэҕи ааҕар, ырыҥалыыр киэҥ билиилээх киһи эбит. Кини Бэрт Ууһун аатырар ыанньыксыттарын ааҕа билэр, кинилэр тустарынан төһөнү баҕарар кэпсиэн сөп.
Оскуола оҕолорун кытары көрсүһүүгэ элбэх араас ыйытыыга хоруйдаан баран: «Дойдугутун таптааҥ, кини сайдарын туһугар биир да хааппыла көлөһүҥҥүтүн атын сиргэ тоҕумаҥ», – диэн кэс тылын тиэртэ. Оҕолор ыйытыылара төһө да судургутун иһин, Михаил Николаевич астынан, сэргэхтик туттан иһиттэ.
Көрсүһүү кэнниттэн Дьоруой Петр Данилов бааһынай хаһаайыстыбатын хотонугар сылдьан кини үлэтин-хамнаһын билистэ. Манна герефорд диэн эт боруода сүөһүлэр иитиллэн тураллар эбит. Ол эрээри, хаһаайын үүккэ үлэлэһэр баҕалааҕын биллэрдэ. Ону Михаил Николаевич сэргии иһиттэ. Кини ордук сүөһүлэр туруктара үчүгэйдэриттэн астынна. Ол аата бу дойду алаастарын ото ураты иҥэмтиэлээх, быйаҥнаахтар эбит диэн сыаналаата.
Нэһилиэнньэни кытары көрсүһүүгэ Михаил Николаевич Чирэпчиттэн саҕалаан Курбуһаҕы, Танданы ситимнээн үрдүк үүтү, үүнүүнү биэрэр ураты быйаҥнаах сирдэр эбит диэтэ. Бэрт Ууһа аны бастакылары биэрбит биир туспалаах. Ол курдук саха дьахталларыттан бастакынан “Бочуот Знага” уордьанынан наҕараадаламмыт, ССРС Үрдүкү Сэбиэтин бастакы ыҥырыытын дьокутаата Ирина Олесова, саха дьахталларыттан бастакынан Социалистическай Үлэ Дьоруойа буолбут Елизавета Бурцева, саха дьахталларыттан бастакынан Үлэ Кыһыл Знамята уордьанынан наҕараадаламмыт Ульяна Данилова – бу үтүөкэн дойду бастыҥнара уонна бары ыанньыксыттар. Онон Михаил Николаевич кинилэргэ улаханнык сүгүрүйэрин биллэрдэ.
Сыырдаахха да көрсүһүүлэртэн Михаил Николаевич олус үөрэн, астынан Тандатыгар айаннаата. Эстафета кэлэр нэдиэлэ саҕаланыытыгар Социалистическай Үлэ Дьоруойа Анастасия Семеновна Копырина дойдутугар Лөгөйгө тиийиэҕэ.
Афанасий Сектяев