Олунньу 16-20 күннэригэр Алдан куоракка «Профессионалы в РС(Я)» идэ маастарыстыбатын регионнааҕы этааба ыытылынна.
Мүрү 1 нүөмэрдээх орто оскуолатын 10 «а» кылааһын үөрэнээччитэ Дарина Ноговицына, салайааччыта оскуола туйгун категориялаах биэлсэрэ, настаабынньык-эксперт Анастасия Жиркова таһымнаах, эппиэтинэстээх куонкуруска «Мэдиссиинэ уонна социальнай көрүү» компетенцияҕа үрдүк ситиһиилээхтик кыттан кэллилэр. Барыта 5 кыттааччыттан түмүккэ Дарина түөрт кыттааччыны кэннигэр хаалларан, I миэстэни ылары ситистэ.
Регионнааҕы этаап Алданнааҕы мэдиссиинэ колледжыгар ыытылынна. Уус Алданы таһынан Чурапчы, ҮөҺээ Бүлүү, Нам, Хаҥалас улуустарын улуустааҕы этаап кыайыылаахтара билиилэрин тургуттулар, сатабылларын көрдөрдүлэр. Куонкурус 4 модультан турар. Күҥҥэ иккилии модуль ыытыллыбыт. Манна кыттааччылар бэриллибит сорудахха кылгас бириэмэҕэ бэлэмнэнэ түһээт, экспертэр иннилэригэр ыарыһаҕы кытта үлэни, киниэхэ мэдиссиинэ көмөтүн оҥорон көрдөрбүттэр. Түөрт модульга барытыгар Дарина олус үчүгэйдик кыттан, экспертэр биһирэбиллэрин ылбыт, куонкурус хаамыытын тухары бэйэтин үчүгэй эрэ өттүнэн көрдөрбүт. Дарина бэйэтэ бастакы модульга долгуйбутум диир. Куонкурус үгүс билиини биэрдэ, ону таһынан иллэҥ кэмҥэ куорат устун экскурсияҕа сылдьан көмүстээх Алдан историятын кытта билистим диэн сэһэргиир.
Бу нэдиэлэ бээтинсэтигэр Гагарин аатынан култуура уонна аныгы уйумньу киинигэр региоҥҥа бастаабыт Дарина Ноговицына наҕараадатын тутуоҕа. Дарина салайааччыта Анастасия Жиркова быйыл бэһис төгүлүн оскуола, улуус аатыттан регионнааҕы этаапка оҕону кытыннарар. Бу иннинэ Нерюнгрига иккитэ, Дьокуускайдааҕы мэдиссиинэ колледжыгар иккитэ уһуйар оҕотун кытта ситиһиилээхтик кыттан турар. Киэҥ билиилээх, үлэҺит, дьоҥҥо ураты болҕомтолоох, эйэҕэс сыһыаннаах уҺуйааччы бэлэмниир оҕотугар үтүө холобур буолар.
Регионнааҕы этаап кыайыылааҕа Дарина Ноговицына уонна салайааччыта Анастасия Федоровна аны сайын Арассыыйатааҕы этаапка тиийэн бүтүн Саха сирин аатыттан кыттыахтара. Онон кинилэри күүстээх үлэ күүтэр.
Елена Сыроватская, уопсас. кэрэсп.