Анал байыаннай дьайыыга быстах хомуур саҕаламмыт кэмиттэн биһиги улуус дьоно-сэргэтэ дойдубут туһугар туруулаһа сылдьар байыастарбытыгар көмөҕө түмсэбит. Маныаха улууспут дьонун түмэ тардан, ыйан-кэрдэн, үтүө холобуру көрдөрөр Саргылана Никитина салайааччылаах Уйулҕа киинин иһинэн үлэлиир «Помощь волонтера бесценна» ыстаап үлэһиттэрэ, Валентина Шадрина салайааччылаах «Швейный патриот» волонтер иис сыаҕа, Дьокуускайдааҕы «Добровольцы» волонтерскай хамсааһын филиалынан үлэлиир Лена Свешникова салайааччылаах Өспөх нэһилиэгин дьоно-сэргэтэ бу сыллар тухары үтүмэн сыраларын, бириэмэлэрин анаан үгүс көмөнү оҥорон кэллилэр. Аҥаардас бу сылга үктэнэн баран туох-ханнык үлэни оҥорбуттарын билиһиннэриим.
Сүүстэн тахса таҥас-сап кэмпилиэгэ бэлэмнэнэр
Республикатааҕы Уйулҕа киинин Уус Алданнааҕы филиалын иһинэн үлэлиир «Помощь волонтера бесценна» ыстаапка номнуо сүүһүнэн наборга диэн анаан миэтэрэнэн матырыйаал атыылаһыллан, наарданан, быһыллан түҥэтиллибит. Бу матырыйаалы улууспут «Эрэл» фондата 200 000 солк. үбүлээн тиктэрэ сылдьар. Тигиллибит таҥастар биирдиилээн анал маллаах мөһөөччүккэ угуллан барыахтара. Наборга сааскы сииктээх күннэртэн харыстыыр плащ тииптээх камуфляж көстүүм, кулирка матырыйаалтан футболкалар, ис таҥастар, саппыкы таһынан кэтиллэр кээнчэлэр (бадараан сыстан ыйааһын буолбатын диэн) тигиллэн угуллаллар. Ону таһынан харысхаллар, анал паракорд быаттан баайыллыбыт браслеттар, ыраастанарга аналлаах оттор, чебурашка, «Айыыларым араҥаччылааҥ» диэн руна суругунан быысапкаламмыт шевроннар баар буолаллар.
Улууспут хас биирдии бөһүөлэгиттэн волонтер түмсүүлэрэ хаххалыыр сиэккэлэри баайа сылдьаллар. Бу үлэҕэ саамай төһүү күүһүнэн кинилэр буолаллар. Ол курдук саҥа сылга көмөлөһөр баҕалаахтар эбиллэннэр, үлэ көдьүүстээхтик тахсар. Мүрү (Бороҕон, Мындааба), Найахы, Дүпсүн (Бээди эмиэ), Чэриктэй, Өнөр, 2-с Лөгөй, 1-кы Өспөх, Бороҕон (Тумул, Элэһин), Лөгөй (Кэптэни, Хомустаах), Өлтөх (Бэйдиҥэ), Бэрт Ууһа, Курбуһах (Уус Күөлэ, Окоемовка), 1-кы Хоро, Байаҕантай, Түүлээх иистэнньэҥнэрэ олунньу саҥатыттан бары тигиллэр таҥастары тэҥинэн үллэстэн олороллор.
Маны таһынан улууспут тэрилтэлэрэ, түмсүүлэрэ, биирдиилээн дьон көмөлөһөллөр. Сылын аайы туора турбакка, киин балыыһа үлэһиттэрэ, медицина колледжын филиалын устудьуоннара көмөлөстүлэр, кииннэммит бибилэтиэкэ кэлэктиибэ, ону таһынан биэнсийэлээхтэр сойуустарыттан Любовь Захарова, Светлана Старостина, Полина Черкашина иистэнэргэ, таҥас быһарга көмөлөһөллөр, 28 мөһөөччүгү тигэн тиксэрбиттэр. Биирдиилээн дьон дьиэлэригэр тигэргэ диэн ылаллар: анал байыаннай дьайыыга сылдьар уоллаах ийэ Анна Васильева алта тактическай көстүүмү, 80 кээнчэни, аҕыс футболканы, Марина Рожина үс көстүүмү, Валентина Лукина үс футболканы, Любовь Саввина үс футболканы, Алена Яковлева биир көстүүмү, биэс футболканы, 10 ис таҥаһы, Людмила Данилова биэс ис таҥаһы тигэн туттардылар. Мүрүтээҕи уолаттар гимназияларын коллектива икки нэдиэлэ устата таҥас быһан көмөлөспүт. Ону тэҥэ биирдиилээн саамай актыыбынай волонтердар Анастасия Копырина, Валентина Жиркова, Саргылаана Прибылых, Галина Чаптыкова, Матрена Артамонова, Лидия Лугинова, Парасковья Аммосова таҥас быһыытыгар, ньэмиэт оҥоруутугар көмөлөрө быыстала суох.
Кулун тутарга улууспут дьаһалтатын делегацията байыаннай дьайыы буола турар сиригэр көмөнү тиэрдэ айанныахтаах. Ол болдьоххо диэри байыастарбытыгар саамай наадалаах таҥаһы-сабы тигэн бэлэмнииргэ ыстаап иһинэн улууспут волонтердара тигинэччи үлэлииллэр.
Кэлэр ыйга диэри 100 пончону тигиэхтэрэ
«Швейный патриот» волонтер иис сыаҕа грант харчытын отчуоттаан бүтэрэн, билигин улууспут салалтата, баһылык Василий Алексеев уонна «Эрэл» фонда дириэктэрэ Иван Захаров сүбэлэһэннэр, дронтан хаххалыыр суорҕан уонна плащ пончо тигиитигэр харчы көрөн, үлэ салгыы ыытыллар. Онон кэлэр ыйга улуус салалтатын делегацията анал байыаннай дьайыыга кытта сылдьар биир дойдулаахтарбытын көрсө барарыгар 80 устуука плащ пончону тигэн ыытар былааннаахтар. Ону таһынан 20 устуука плащ пончо тигиллэн, уоппускаҕа кэлээччилэргэ эбэтэр саҥа барааччыларга анаан манна бэлэм хаалыахтаах. Онон барыта 100 устуука пончо тигиллиэхтээх.
Салгыы сыах салайааччыта Валентина Шадрина маннык кэпсээтэ:
«Анал байыаннай дьайыыга барааччылар биирдиилээн кэлэллэр, олорго түөрт устуука пончону биэрэн ыыттыбыт.«Якутия с тобой» (сал. А.Н. Ефимова) волонтердарын кытта хара маҥнайгыттан ыкса сибээстээхтик үлэлээн кэллибит. Сороҕор кинилэртэн эмиэ матырыйаал бэриһиннэрэн туттабыт, сакаастарын иистэнэбит. Кинилэргэ 10 устуука плащ пончону тигэн ыыттыбыт.
Плащтарбытын биир-биир мөһөөччүк тигэн угабыт. Бу мөһөөччүктэрбит матырыйаалларын нэһилиэкпит дьаһалтатын баһылыга Прокопий Румянцев өйөөн «Сайдам» маҕаһыынтан ылан биэрдэ. Волонтердар күн ахсын үлэлэригэр кэлэр курдук эппиэтинэстээхтик сыһыаннаһан иистэнэллэр. Чахчы ис сүрэхтэн, үтүө санааларынан кэлэн иистэнэр дьоммунан биир бэйэм киэн туттабын, махтанабын. Бастакы күммүтүттэн саҕалаан биир санаалаах биригээдэ буолан үлэлиибит. Тохсунньуттан биһиэхэ Анна Васильева көмөлөһөн иистэнэр. Анна Константиновна уола быстах хомуурга түбэһэн анал байыаннай дьайыыга кытта сылдьар. Биһиэхэ кэлэн кэпсэтэн, иистэнэн, бэйэтин санаатын уоскутан, туһалааҕы оҥороруттан олус үөрэр. Бу күннэргэ былааммыт улахан аҥаара тигилиннэ, кулун тутар саҥатыгар түмүктүөхпүт».
Өспөхтөр хаххалыыр сиэккэни өрүүнү баһылаатылар
Өспөх нэһилиэгин олохтоохторо сыл саҥатыттан 39 хаххалыыр сиэккэни өрдүлэр. Билигин эмиэ 40-ча сиэккэ тахсар матырыйаалын «Добровольцы» хамсааһын (сал. Светлана Архипченко) ыстаабыттан ылан олороллор.
Сыл устата 100-120 устууканы өрөр былааннаахтар. Ону тэҥэ улуус баһылыга Василий Алексеев өйөөн «Эрэл» фондаттан матырыйаал харчытын төлөтөн, «Добровольцы» матырыйаалын кытта «Якутия» АК босхо аҕалтаран эмиэ техникаҕа аналлаах 40-ча сиэккэ тахсар матырыйаалын Бээрийэ, Баатаҕай, Найахы, 1-кы Хоро волонтердарыгар түҥэппиттэр. Өспөхтөр ыйан-кэрдэн биэрэргэ бэлэмнэр. Түргэнник ылсан кулун тутарга улууспут делегацията барыытыгар байыастарбытыгар ыытар соруктаахтар.
Мария Аргунова