Бүгүн улуустааҕы кииннэммит бибилэтиэкэ ааҕар саалатыгар улууспут электрификациятын туһунан кэпсиир “Сырдыгы, сылааһы саҕааччылар” диэн кинигэ сүрэхтэннэ. Бу улууспутугар электричество хаһан кэлбитин, бастакынан кимнээх үлэлээбиттэрин туһунан историческай чахчылардаах уонна араас сылларга үлэлээбиттэр, кинилэр оҕолорун ахтыылара киирбит дьоһун кинигэ Дьокуускайга “Кэм” издательствоҕа сахалыы, нууччалыы тылынан тахсыбыт.
Үөрүүлээх күҥҥэ улууспут баһылыга Василий Алексеев, “Якутскэнерго” ПАУо Киин электрическэй ситимнэрин дириэктэрэ Петр Иванов, электрическэй ситимнэри көрөр-истэр сулууспа кылаабынай эксперэ Иван Копырин уонна нэһилиэктэр баһылыктара кыттан эҕэрдэлэрин эттилэр, кинигэ туһунан санааларын үллэһиннилэр. Кинигэ хайдах оҥоһуллубутун туһунан хомуйан таһаарааччылартан биирдэстэрэ, 1982-1986 сс. Бороҕоннооҕу РЭС начальнигынан үлэлээбит Василий Прокопьев кэпсээтэ. Кини бу кинигэҕэ бастаан суруналыыс Василий Сивцев – Мүрү Баһылай ылсан үлэлэһэн испитин туһунан, онтон кини олохтон барбытын кэннэ Наталья Константинова, Михаил Куличкин, Николай Алексеев буолан үлэлэһэннэр таһааттарбыттарын туһунан кэпсээтэ. Үс сыл үлэлэһэн кинигэ ааҕааччыга тиийбититтэн олус үөрбүтүн биллэрдэ. Салгыы Бороҕоннооҕу РЭС бастакы начальнигынан үлэлээбит Олег Тян, саамай уһуннук 29 сыл начальниктаабыт Николай Алексеев, бэтэрээннэр Николай Ксенофонтов, Роман Олесов ахтыы оҥордулар.
Улууспутугар бастакынан электричествоны киллэрбит киһинэн кыһыл бартыһаан Дмитрий Алексеев – Кымахы буолар. Кини 1936 сыллаахха Мүрү Томторугар аан бастаан локомобилы аҕалан уоту бэрдэрбитэ биллэр. Бүгүн кини туһунан сыдьаана Хомустаах бөһүөлэгин олохтооҕо Василий Бурнашев бэрт сэргэх түгэннэри кэпсээтэ.
Үөрүүлээх тэрээһиҥҥэ наҕараадалар эмиэ бааллар. Ол курдук Уус Алдан улууһун бочуоттаах олохтооҕунан РЭС бэтэрээнэ Николай Ксенофонтов буолла. “Уус Алдан улууһун социальнай-экономическэй сайдыытыгар кылаатын иһин” бэлиэнэн Олег Тян уонна Александр Константинов наҕараадаланнылар. Оттон РЭС бэтэрээнэ Роман Олесов Бэрт Ууһун нэһилиэгин бочуоттаах олохтооҕо буолла. Өр сылларга Бороҕоннооҕу РЭС-кэ техническэй үлэһитинэн үлэлэбит Анастасия Павлова “Мүрү нэһилиэгин социальнай-экономическэй сайдыытыгар кылаатын иһин” бэлиэнэн наҕараадаланна. Оттон Тандатааҕы сетевой учаастак маастара Владислав Колодезников “Байаҕантай нэһилиэгин социальнай-экономическэй садыытыгар кылаатын иһин” бэлиэнэн наҕараадаланна.
Түмүк тылы Бороҕоннооҕу РЭС начальнига Николай Седалищев эттэ. Кини кинигэ таһаарбыттарга улахан махталын биллэрдэ. Маннык тэрээһини тэрийбит бибилэтиэкэ кэлэктиибигэр эмиэ махтанан туран, фонда хаҥыырыгар анаан улуус нэһилиэктэрин хас биирдии бибилэтиэкэтигэр саҥа кинигэни бэлэхтээтэ.
Афанасий Сектяев
Улуус дьаһалтатын пресс-сулууспатын хаартыскалара