Сэтинньи 27 күнүгэр Дьокуускай куоракка Россияҕа Ийэ күнүн көрсөр тэрээһиҥҥэ Мүрү нэһилиэгин олохтооҕо, тоҕус оҕо ийэтэ Любовь Михайловна Колодезникова оҕону иитиигэ уонна дьиэ кэргэни бөҕөргөтүүгэ кылаатын иһин «Ийэ Албан аата» I истиэпэннээх бэлиэни үөрүүлээх быһыыга-майгыга туппута. Бу эдэркээн бэйэлээх кэрэ куо тоҕус оҕо ийэтэ буоларын киһи итэҕэйимиэн да курдук.
Любовь бэйэтэ парикмахер идэлээх. Ол эрээри, дьахтар киһи бу сиргэ кэлбит үрдүк анала ийэ буолуу, кэнчээри ыччаты иитии буоларын эдэр бэйэтигэр таба өйдөөн, оҕолорун көрөн олорор. Ыал аҕата Руслан Русланович Ильин Амурскай уобаласка баахтаҕа сылдьар. Уоппускатыгар суол тэрилтэтигэр үлэлиир. Ильиннэр 7 уол уонна 2 кыыс оҕолордоохтор. Улахан уол Эрхан – Жатайдааҕы техникум устудьуона. Уу суудунатын ыытааччы идэтин баһылыахтаах. Кыра эрдэҕиттэн мас тардыһыынан дьарыктанан, улууска, өрөспүүбүлүкэҕэ миэстэлэһэр. Иккис уол Эрсан ахсыс кылааска үөрэнэр, спортивнай хаамыынан дьарыктанар, сүүрүк. Улуус, өрөспүүбүлүкэ сүүмэрдэммит хамаандатын чилиэнэ. Россия сүүмэрдэммит хамаандатыгар киирэргэ үлэлэһэр. Ити баҕата туоларыгар дьиэ кэргэн бүттүүн эрэллээх.
«Онтон соһуччу кыыстаах уол игирэлэнэ түспүппүт. Эркиннээх Ева билигин 4-с кылааска үөрэнэллэр. Кинилэр кэннилэриттэн тилэх баттаһа төрөөбүт Эрчимэн Бэргэн 3-с кылааска үөрэнэр. Салгыы күн сирин көрбүт күүтүүлээх мааны кыыспыт Эмилия уһуйааҥҥа сылдьар. Айыыһытым маанылыыра өссө иннибэр күүтэрэ. Ол – өссө төгүл игирэлэнии. Кырачаан уолаттарбыт 2 саастарын ааһан, хайыы үйэ уһуйаан дьоно. Саамай кырачааммыт Таман уол 1 сааһын туолла», – диэн эдэр ийэ дьиэ кэргэнин билиһиннэрэр.
Уолаттар сайын аайы балыктыыллар, аҕаларын батыһан, булка сысталлар. Любовь кыргыттарын кытта оҕуруоттарыттан соло булбаттар.
«Оҕону иитиигэ ийэлээх аҕа бэйэ-бэйэлэригэр сыһыаннара суолталаах. Бэйэ-бэйэлэрин таптаһар төрөппүттээх оҕо эрэллээхтик сананар, тапталга иитиллэр. Оҕону кыра эрдэҕиттэн дьиэ ис-тас үлэтигэр сыһыарыы кэлин бэйэ туһугар эппиэтинэстээх, сыаллаах буоларга иитэр. Дьахтар сирдээҕи аналынан оҕолорбун көрөн-истэн, кинилэр үөрэхтэрин, дьарыктарын өрө тутан олорорум дьиэ кэргэн олоҕор биллэр. Онтон мин дьоллоохпун», – диэн Любовь Михайловна санаатын үллэстэр.
Кини олоххо сыһыана, муударай көрүүтэ эдэр ийэлэргэ холобур буолуох тустаах.
Уйаара КУСТУК