Василий Петрович Танда бөһүөлэгэр социальнай объектарга: оскуолаҕа, оскуола интернатыгар, оҕо уһуйааныгар, балыыһаҕа, билигин үлэлии турар спорт саалатыгар сылдьан балаһыанньаны билистэ, ону тэҥэ Үлэ Геройдаах, 1175 сүөһүнү, 879 сылгыны иитэр нэһилиэккэ тыа хаһаайыстыбатын салаатыгар үлэни-хамнаһы көрдө-иһиттэ.
Оскуола уонна оҕо уһуйаана оҕо үөрэнэригэр, иитиллэригэр усулуобуйалара баара бэлиэтэннэ. Оттон оскуола интерната уустук балаһыанньалааҕынан суһал дьаһаллары ыларга сорук турар. Икки этээстээх олохтоох балыыһаҕа ыарыһах куойкатын миэстэтэ быһыллан, үөһээ этээс кураанах турарынан, инники өттүгэр балыыһа дьиэтин хайа хайысханан сайыннарар туһунан үөрэтэн көрөргө быһаардылар.
Салгыы Үлэ Албан аата орден толору кавалера, Россия Үлэҕэ Геройа, Саха Республикатын бочуоттаах олохтооҕо, «Удьуор» бааһынай хаһаайыстыба баһылыга Михаил Готовцевка ыалдьыттаатылар.
Михаил Николаевич саҥа салалтаҕа үлэтин-хамнаһын билиһиннэрдэ. Саха сирин историятыгар симментал боруоданы сайыннарыыга сүҥкэн үлэни ыыппытын, бу боруоданы билигин элбэх хаһаайыстыбаҕа удьуордаан иитэллэрин, Саха сирин тымныытын тулуйарын иһин кэлин голштино-фризскай германскай боруоданы сайыннаран, билигин ыраас боруодаҕа тахсыбытын туһунан кэпсээтэ. Ону сэргэ күн бүгүн 100-чэкэ ынаҕы ыылларын, ходуһа сири оҥорууга элбэх үлэни ыыппыттарын, инники өттүгэр хотоннорун кэҥэтэр былааннаахтарын иһитиннэрдилэр. Михаил Николаевич Василий Петровичка тыа хаһаайыстыбатын сайдыытыгар болҕомтотун ууран үлэлииригэр баҕа санаатын тиэртэ.
Улуус дьаһалтатын пресс-сулууспата