Саха сиригэр Ийэ, Россияҕа Аҕа күнүнэн, улууска биллэриллибит Дьиэ кэргэн ыйын чэрчитинэн, бүгүн “Айар күн” диэн бэрт сэргэх тэрээһин ыытылынна. Тэрээһини «Биир ньыгыл Россия» баартыйа улуустааҕы салаата уонна улуус дьаһалтата тэрийэн ыыттылар.
Мустубут дьоҥҥо эҕэрдэ тылы улуус баһылыгын солбуйааччы Григорий Аргунов, «Биир ньыгыл Россия» баартыйа улуустааҕы салаатын сэкирэтээрин эбээһинэһин толорооччу Иннокентий Аммосов эттилэр. Бу күн улууспут талба талааннаахтара Матрена Бурнашева фермуардаах дьоҕус суумка, Оксана Тарская туойтан тэриэлкэ, Анастасия Семенова гипсэттэн оҥоһуктарга, Алла Ивнова уруһуйга, Таисия Базарова уонна Елена Слепцова байыаннай дьайыы кыттыылаахтарыгар браслет өрөргө, эбии үөрэхтээһин киинин ИТ-киин үлэһиттэрэ Максим Свинобоев, Сангун Атласов нейро-ситими хайдах туһанарга, Нюргуяна Егорова «Олох маһа» уруһуйга, Евгения Местникова харысхал-открытка оҥорорго маастар кылаас биэрдилэр. Маны тэҥэ улуустааҕы кииннэммит бибилэтиэкэ үлэһиттэрэ «Биэс ойбон», «Тэтим таас», «Тыксаан», «Чэ, эрий» диэн остуол оонньууларын оонньоттулар. Тэрээһин устата айар-тутар дьоҕурдаах дьоммут быыстапка-дьаарбаҥкалара элбэх киһини угуйда.
Мария АРГУНОВА