Бүгүн Чэриктэй, Өлтөх уонна Лөгөй нэһилиэктэрин дьаһалталарын эппиэттээх үлэһиттэрэ баһылыгы кытта көрсүбүттэрин улуус дьаһалтатын пресс-сулууспата иһитиннэрэр.
Чэриктэйгэ билиҥҥи туругунан нэһилиэнньэ ханна да мустар, түмсэр сирэ суох. Ол иһин культурнай-спортивнай комплекс тутуллара саамай тыын боппуруос буоларын нэһилиэк баһылыга Федор Карманов бэлиэтээтэ. Манна нэһилиэк дьаһалтата үлэлэһэ сылдьарын, бырайыага уонна сметата бэлэмин иһитиннэрдэ, салгыы программаҕа киллэрэн, тутуу ыытылларыгар улуус дьаһалтатын кытта бииргэ үлэлэһэргэ кэпсэттилэр.
Маны сэргэ киин котельнай аварийнай туруктааҕынан инникитин саҥа котельнайы тутуу, оҕо уһуйааныгар өрөмүөн, анал байыаннай дьайыы кыттыылааҕын дьиэтин ититии ситимигэр холбооһун, бөһүөлэги сырдатыы үлэлэрэ ыытылларыгар соруктар туралларын иһитиннэрдэ.
Оттон Өлтөх нэһилиэгин баһылыга Константин Алексеев олохтоох балыыһа дьиэтэ эргэрэн, аварийнай туруктааҕынан саҥа врачебнай амбулаторияҕа, Арыылаахха коррекционнай оскуолаҕа саҥа тутуулар наадаларын эттэ. Маны таһынан Арыылаахха киин котельнай бырайыага уонна сметата оҥоһуллан бүтэн, программаҕа киллэриигэ үлэлэһэргэ, ону тэҥэ бөһүөлэк иһинээҕи суоллары өрөмүөннээһин, онтон да атын кыһалҕалаах боппуруостарыгар тохтоото.
Лөгөй нэһилиэгин баһылыга Николай Попов нэһилиэккэ чааһынай дьиэлэри ититии ситимигэр холбуурга Кэптэнигэ киин котельнайын күүһүрдэр үлэ ирдэнэрин эттэ. Итиэннэ Кэптэнигэ «Чэчир» оҕо уһуйааныгар, П.П. Оготоев аатынан культура сынньалаҥ киинигэр капитальнай өрөмүөн үлэтэ, Лөгөйдөөҕү лицей-интернакка улуус бары нэһилиэктэриттэн оҕолор кэлэн үөрэнэллэрэ үксээбитинэн, интернакка саҥа дьиэни, эдэр специалистарга уопсай дьиэни, Хомустаах бөһүөлэгэр сынньалаҥ киинигэр эмиэ саҥа тутууну, Кэптэни – Даалы айан суолугар өрөмүөнү уонна да атын кыһалҕалаах боппуруостары туруоруста.