Балаҕан ыйын 29 күнүгэр улуус дьаһалтатын баһылыга Василий Алексеев Ил Дархан Айсен Николаевы кытта көрсүһүүгэ сырытта.
Айсен Сергеевич ааспыт быыбарга улуус олохтоохторун баһыйар куоластарын ылан, улуус дьаһалтатын баһылыга буолбутунан эҕэрдэлээн туран, нэһилиэнньэ олоҕо туруктаах буолуутугар, тыа хаһаайыстыбатын, ДьУоКХ салааларын сайыннарыыга үлэни-хамнаһы ыытарга сорук туруорда. Билиҥҥи уустук кэмҥэ анал байыаннай дьайыы кыттыылаахтарыгар уонна кинилэр дьиэ кэргэттэригэр улахан болҕомтону уурарга тоһоҕолоон бэлиэтээтэ.
Василий Петрович улуус киинигэр Бороҕоҥҥо саамай тыын кыһалҕанан буолбут кирдээх ууну кутар «Бүөр» алаас туолан, таһынан баран, Мүрү эбэни киртитэр куттала үөскээбитинэн канализационнай-ыраастыыр станцияны тутар туһунан, итиэннэ олохтоохтор өр сылларга кэтэспит улуустааҕы кииннэммит балыыһа иккис корпуһун тутуутун «2026-2030 сылларга доруобуйа харыстабылын бастакы звенотун саҥардыы» программатыгар киллэрэн үлэни ыытарга, 2023 сылтан Танда бөһүөлэгэр тутуута саҕаламмыт спорт саалата үп-харчы тиийбэтинэн тохтотуллан турарын салгыы үбүлээн үлэҕэ киллэрэргэ, Тумул бөһүөлэгэр оскуоланы тутар подрядчик былааннаах үлэни ыыппатаҕын түмүгэр үлэ тохтотуллан турарын сөргүтэргэ, инвестиционнай программаҕа Өнөр орто оскуолатын тутуутун киллэрэргэ туруоруста.
Айсен Сергеевич билиҥҥи кэмҥэ үп-харчы боппуруоһа төһө да ыарахаттардааҕын иһин, биир өйүнэн-санаанан салайтаран үлэлиэхпит диэн эттэ.
Бу күн Василий Петрович өрөспүүбүлүкэ бырабыыталыстыбатын бэрэссэдээтэлин солбуйааччытын Сергей Местниковы кытта көрүстэ.
Көрсүһүүгэ улуус сайдыытыгар ыытыллар үлэлэр тула кэпсэттилэр. Түмүгэр Василий Петрович 2030 сылга Уус Алдан улууһа төрүттэммитэ 100 сыллаах үбүлүөйүн тэрийэн ыытыыга бэйэтин санааларын үллэһиннэ.
Улуус дьаһалтатын пресс-сулууспата