Балаҕан ыйын 26 күнүгэр СӨ Ырыа айааччыларын Сойууһун 25 сылынан отчуоттуур-быыбардыыр мунньаҕа буолла. Сойуус 135 чилиэннээх, ол иһигэр народнай артыыстар, СӨ, Россия культураларын үтүөлээх үлэһиттэрэ, туйгуннара, норуот үөрүүтүн-хомолтотун үллэстэн, Аар айылҕабыт кэрэтин иэйэн-куойан туран туойан, дьоммут-сэргэбит духуобунай баайын байытан, сүрэхтэрин баҕатынан айа-тута сылдьаллар. Ону таһынан хас эмэ сүүһүнэн Сойууска киирэ илик ырыа айааччылар үлэлииллэр. Сойуус салайааччыларынан СӨ норуодунай артыыһа Алексей Егоров, СӨ культуратын үтүөлээх үлэһиттэрэ Степан Васильев, Саргылаана Адамова үлэлэрин таһынан үлэлээн кэллилэр. Отчуоттан көстөрүнэн, улуустар түмсүүлэрин кытта иитэр-үөрэтэр, атын салаалары кытта бииргэ үлэлэһии, кинигэ, диискэ, клип таһаарыытыгар семинардар, конкурстар, кэнсиэрдэр, саҥа мелодистары, оҕолору кытта үлэ тиһигин быспакка ситиһиилээхтик барбыттар.
“Тойон Мүрү” түмсүүбүт үлэтэ элбэхтэ ахтылынна. Мунньахха да, кэнсиэргэ да биһиги улуустан төрүттээх саамай элбэх ырыа айааччы кытынныбыт. Василий Петухов, Станислав Луковцев, Гаврил Свинобоев — Гайаат, ырыанньык коллекционера Мариса Васильева, Николай Андросов, Сергей Сыроватскай, Юрий Сивцев, Бүөккэ Бөтүрүөп, Николай Бурнашев — Чысхаан, түмсүүбүт Сүбэтин чилиэнэ Алексей Калининскай махтал суруктарынан, сэдэх кинигэлэринэн бэлиэтэннилэр. Василий Федоров “Үйэлээх ырыаны айбытын иһин” Сойуус саамай улахан бэлиэтинэн, Василий Парников Ил Түмэн Культураҕа, наукаҕа комитетын бочуотунай грамотатынан наҕараадаланныбыт, мунньахха тыл этэн кытынныбыт. Отчуот “үчүгэйинэн” сыаналанна. Быыбарга Сойуус сэбиэтэ биир дойдулаахпытын, ”Тойон Мүрү” түмсүү чилиэнин, Николай Протопопов Сыырдаах филиалыгар иитэн таһаарбыт уолун, тахсыылаахтык үлэлиир ааптар Николай Андросовы эппитин 100 бырыһыан куоластаан таллыбыт. Сэкирэтээринэн тахсан эрэ мелодистка, тэрийээччи Милена Борисованы таллыбыт. Николай Хатас оскуолатыгар ситиһиилээхтик үлэлии сылдьар, өрөспүүбүлүкэҕэ, Россияҕа биллэр ырыалары айда, таһыма сылтан сыл үрдээн иһэр. Бу саҥа үлэтигэр ситиһиини баҕарыаҕыҥ!
Ол кэнниттэн биллиилээх мелодист, оператор, Бороҕоҥҥо айымньылаахтык үлэлии сылдьыбыт, хомойуох иһин, кэргэнинээн Светланалыын эрдэ олохтон барбыт талааннаах кэрэ дьон Иван Аргуновтаахха анаммыт улахан, кэрэ оҥоһуулаах кинигэлэрин презентациятын долгутуулаах тэрээһинэ буолла. Иван Аргунов айбыт, норуот уостан түһэрбэккэ ыллыы сылдьар “Ырыа ыллаары” ырыатын мунньахха да, кэнсиэрдэргэ да ыллаан ньиргиттибит. Мунньах кэнниттэн өрөспүүбүлүкэ бастыҥ мелодистарын кэнсиэрэ дохсун ытыс тыаһынан доҕуһуолланан, өргө диэри араас эгэлгэ кэрэ ырыа дьиэрэйдэ! Өрөспүүбүлүкэ биир бастыҥ “Тойон Мүрү” түмсүүтүн чилиэннэрэ кэлэр өртүгэр, бэйэбит уолбутун сойуус бэрэссэдээтэлин Николай Андросовы өйөөн, норуоппут духуобунаһа үрдүүрүн туһугар өссө айымньылаахтык, тахсыылаахтык үлэлииргэ бэлэммит.
Василий Парников, “Тойон Мүрү” түмсүү салайааччыта, РФ, САССР культураларын үтүөлээх үлэһитэ