Үөрэхтээһин биир сүрүн соругунан доруобуйаларынан хааччахтаах оҕолорго хаачыстыбалаах үөрэҕи ылалларыгар сөптөөх усулуобуйаны тэрийии буолар. Россия Үөрэҕин министерствота 2024 сыл алтынньытыгар үөрэхтээһин сокуонугар киирбит уларыйыыларга олоҕуран психологическай кииннэр уонна доруобуйаларыгар хааччахтаах оҕолору көрөр ПМПК хамыыһыйатын үлэтигэр анал дьаһаллары ылыммыта. Бу дьаһалларга сөп түбэһиннэрэн Уус Алдан улууһугар кулун тутарга туһунан юридическай тэрилтэ быһыытынан Психологическай-педагогическай көмө киинэ арыллан, балаҕан ыйыттан анал үөрэхтээх алта специалиһынан хааччыллан үлэтин саҕалаата.
Урукку сылларга бу сулууспа үөрэх управлениетын иһинэн хамыыһыйа быһыытынан үлэлии олорбута, ол саҥа сокуоҥҥа сөп түбэспэт буолла. Оттон республика үрдүнэн 13 улууска оннук хамыыһыйа баарыттан аан бастакынан Уус Алдан улууһугар киин тэрилиннэ. Киин дириэктэринэн үөрэх управлениетыгар өр сылларга отделы салайан олорбут Мираида Стрекаловская ананна.
Улууспутугар ааспыт үөрэх сылыгар доруобуйатынан хааччахтаах 220, инбэлиит 138 оҕо оскуоланан, оҕо уһуйаанынан хабыллыбыттара. Уонча сыллааҕыта маннык оҕобут ахсаана 80-тан эрэ тахса этэ.
Билигин психологическай киин иһинэн быыстала суох үлэлиир ПМПК хамыыһыйата үлэлииригэр усулуобуйа оҥоһуллан, оҕолорго, төрөппүттэргэ миэстэтигэр, улууспутуттан атын сиргэ барбакка, сөптөөх көмө оҥоһуллуоҕа. Быйылгы сүрүн сорук үөрэх тэрилтэлэригэр анал үөрэхтээх специалистарынан хааччыйыы, ону таһынан анал ПМПК рекомендацияларын миэстэтигэр толорон, олоххо киллэрэн, оҕолорбутугар сөптөөх усулуобуйаны тэрийии буолар.
Саҥа 2025-2026 үөрэх дьылыттан “Цифровой психолог” диэн үөрэхтээһин цифровой сервиһин (ЦОС), ГосТех цифровой Российскай платформа нөҥүө саҥа бырайыак үлэлиэҕэ. Саҥа тэриллибит киин психологтара федеральнай бырайыакка киирэн анал үөрэхтээһини ааһан үлэлиэхтэрэ. Сыыйа “Цифровой психолог” бырайыакка хас биирдии оскуола, уһуйаан психологтара киириэхтэрэ.
Саҥа психологическай киин үөрүүлээх аһыллыыта балаҕан ыйын 11 күнүгэр былааннанар.