Россия Үлэҕэ Дьоруойа, Үлэ Албан аата уордьан толору кавалера Михаил Николаевич Готовцев үбүлүөйдээх 80 сааһыгар аналлаах “Килбиэннээх үлэ эстафетата” патриотическай тэрээһин кулун тутар 4 күнүгэр Курбуһах нэһилиэгиттэн саҕаланна. Биллэрин курдук, Курбуһах – аатырбыт сиилэсчит, сүөһү сүмэһиннээх аһылыгын бэлэмнээһиҥҥэ үрдүк кирбиилэри ситиспит, Үлэ Албан аата уордьан толору кавалера Николай Дмитриевич Бурнашев дойдута. Ону тэҥэ Михаил Николаевич элбэхтик алтыспыт, араас тэрээһиннэргэ, чиэстээһиннэргэ куруутун бииргэ сылдьыбыт истиҥ доҕоро буолар. Маннык десаны тэрийиэххэ диэн бырайыак ааптара, улуустааҕы бэтэрээннэр Сэбиэттэрин бэрэссэдээтэлэ Иван Колодезников тэҥҥэ сылдьыста.
Тэрээһин олус киэҥ хабааннаах буолла. Ол курдук спорт саалатыгар дьоруой үлэҕэ, култуураҕа, спорка ситиһиилэрин кэпсиир улахан быыстапка турда. Михаил Николаевич эдэр сааһыгар бастыҥ сүүрүк, хайыһардьыт быһыытынан оройуоҥҥа биллэрэ. Аны кулууп сыанатыгар таҕыстаҕына үҥкүүһүт бэрдэ. Спорка улахан ситиһиитинэн Ленинградка үөрэнэ сылдьан кросска Ленинградскай уобаласка иккис миэстэ буолбута буолар.
Кини 1966 сыллаахха оскуоланы бүтэриэҕиттэн сүөһү иитиититтэн илиитин араарбакка, күн бүгүнүгэр диэри үлэли сылдьар. Ол аата 60 сыл устата үлэни өрө тутан үлэлиир-хамсыыр.
Десант, биллэн турар, кэлэр кэскили, оскуола үөрэнээчилэрин патриотическай иитиигэ ананна. Ол иһин Михаил Николаевич аан бастаан оскуола оҕолорун кытары көрүстэ. Олус истиҥ сэһэргэһии буолла. Оҕолор араас боппуруоһу биэрдилэр. Оннооҕор “үүттэн дуу, эттэн дуу, хайаларыттан ордук барыһы ылыахха сөбүй?” диэн бэрт дириҥ ис хоһоонноох ыйытыы бэрилиннэ. Онуоха Дьоруой: “Үлэни таптыыр, сатаан тэрийэр буоллахха, хайатыттан да барыһы ылыахха сөп”, – диэтэ. Оҕолор ыйытыыларын Михаил Николаевич балта, тэҥҥэ үлэлэһэ сылдьааччы Анастасия Готовцева эмиэ олус сэҥээрэн хоруйдары өссө дириҥэтэн, кэҥэтэн кэпсээн биэрдэ.
Салгыы нэһилиэнньэни кытары эмиэ көрүстэ. Манна да бэрт истиҥ кэпсэтии буолла. Михаил Николаевич көрсүһүүттэн олус астынан, дуоһуйан сүөһү иитиитинэн дьарыктанар ыччаты өйүүрүн биллэрэн улахан материальнай көмөнү оҥорорун эттэ. Ол курдук сүөһү ииттэн хаһаайыстыба тэринэ олорор, биэс оҕолоох эдэр ыал аҕа баһылыгар Петр Наумовка ыраас хааннаах племенной оҕуһу бэлэхтиирин биллэрдэ. Бу оҕуһу Петр бэйэтэ эрэ буолбакка, ыкса ыаллара, эмиэ эдэр сүөсүһүт Мария Гуляев хаһаайыстыбата эмиэ туһанарыгар эттэ. Онон Курбуһахха сүөһү боруодата тупсарыгар олук уурулунна. Биллэрин курдук, Михаил Николаевич үлэлиирин устатыгар племенной үлэнэн дьарыктанан кэллэ. Ынах боруодатын тупсарар эрэ буоллахха, элбэх үүтү ыахха сөбүн чахчы көрдөрбүт киһи.
Эстафета салгыы Бэрт Ууһун нэһилиэгэр айаннаата.
Афанасий Сектяев