Кулун тутар 13 күнүгэр Максим Аммосов аатынан Нам улууһун киэҥ-куоҥ саҥа култуура дыбарыаһыгар саха биир бастакы композитора, норуот тапталын ылбыт Захар Винокуров ырыаларыгар оҕолорго, самодеятельнай, профессиональнай толорооччуларга диэн группаларынан 150 кыттааччылаах республикатааҕы куонкурус үрдүк таһымнаахтык буолан ааста.
Саха композитордарын Сойууһун сэкирэтээрэ Кирилл Герасимов, биллиилээх мелодист, музыкальнай обозреватель Владимир Корякин, РФ үтүөлээх артыыската Анна Дьячковская, биллиилээх хормейстер Елена Кутукова, норуот айымньытын дьиэтин хордары кытта үлэлэһэр сүрүн специалиһа Анастасия Аммосова курдук улахан дьүүллүүр сүбэ үлэлээтэ. Онуоха “Кэнчээри” ансаамбыл 4 солистката Виолетта Омукчанова 1 истиэпэннээх дипломант, Света Пермякова 1 истиэпэннээх, Далаана Черкашина 2 истиэпэннээх, Вика Терехова 3 истиэпэннээх лауреат үрдүк аатын кытары харчынан бириэмийэ ылан үөрэн-көтөн кэллилэр.
Гран прины Нам уола Дьулурҕан Харитонов ылыан ылла! Уонтан тахса ансаамбыллар кыттыбыттарыттан куорат музыкальнай оскуолаларын учууталларын ансаамбыла гран-при үрдүк аатын ылла. Биһиги улуустан Өнөртөн Василий Федоров салайар икки ансаамбылыттан Дьүөгэ ансаамбыла 2 истиэпэннээх дипломант буоллулар.
Куонкурус биллиилээх иис маастара Анна Зверева бырайыагынан улуус салалтатын улахан тэрийэр комитетын салалтатынан барда. Ол иннинээҕи күн Дьокуускайдааҕы национальнай библиотекаҕа ыытыллыбыт улахан учуонайдар, култуура деятеллэрэ кыттыылаах норуоттар икки ардыларынааҕы састааптаах конференцияҕа З. Винокуровка композитор аатын биэрэргэ уураахтаан, историческай кырдьыгы олохтообуттарын дьон-сэргэ дохсун ытыс тыаһынан эҕэрдэлээтилэр.
@uamurusahargata
@ulusmedia