Мүрү 1 нүөмэрдээх орто оскуолатын бэтэрээн учуутала, РСФСР норуотун үөрэҕириитин туйгуна, Учууталлар учууталлара, «Үйэ саас» бэлиэлээх Уус-Алдан улууһун бочуоттаах олохтооҕо Гоголева Матрена Семеновна бүгүн 102 сааһын этэҥҥэ көрүстэ. Оскуола администрацията, профкома дьиэтигэр тиийэн Матрена Семеновнаны истиҥник эҕэрдэлээтибит.
Матрена Семеновна педагогическай үлэтин 1942 сыллаахха Хоро начаалынай оскуолатыгар учууталынан саҕалаабыта. Сэрии кэмигэр 1943 с. Бороҕоҥҥо бастакы детсады тэрийсибитэ. 1945 сыллааҕы оройуоннааҕы Кыайыы ыһыаҕын кыттыылааҕа. Мүрү орто оскуолатыгар 44 сыл устата сүүһүнэн оҕону ааҕарга, суруйарга үөрэппитэ. Кэргэнинээн Аҕа дойду Улуу сэриитин кыттыылааҕа, 43 сыл устата учууталлаабыт Алексей Николаевич Слепцовтуун педагогическай династияны төрүттээбиттэрэ.
Матрена Семеновна төһө да сааһырдар күн бүгүн өйө-санаата ыраас, өрөспүүбүлүкэ, улуус сонуннарын истэ-билэ олорор. «Мүрү саһарҕата», «Кыым» хаһыаттары ааҕар, «Туймаада» хаһыат сабыллыбытыттан хомойор. Ытык киһибит Матрена Семеновна оскуола кэлэктиибигэр өйдөһөн-өйөһөн үлэлээһини, бэйэ бэйэҕэ убаастабыллаах сыһыаны, кэскиллээх үлэни, үгүс ситиһиилэри баҕарда.
Елена Сыроватская, уопсас. кэрэсп.