Биллэрин курдук, ахсынньы 3 күнүгэр Доруобуйаларынан хааччахтаах дьон аан дойдутааҕы күннэрэ буолан ааспыта. Ол чэрчитинэн ахсынньы 3-12 күннэригэр Мүрү нэһилиэгин баһылыгын дьаһалынан анал декада түмүктэнэн эрэр. Быйылгы тэрээһин Арассыыйаҕа Дьиэ кэргэн, Саха сиригэр Оҕо саас, улууска Аҕа сылларыгар тирэннэ. Декада иһинэн ыытыллар араас хайысхалаах тэрээһиннэртэн биирдэстэрэ – Доҕордоһуу киэһэтэ.
Мүрү нэһилиэгин инбэлииттэрин уопсастыбата кэккэ сылларга салайааччыта суох үлэлээн кэлбитэ. Бу күннэргэ саҥа бэрэссэдээтэлинэн Елена Федотовна Попова талыллан, бастакы тэрээһинин ситиһиилээхтик ыытта.
Эргэ гимназия дьиэтигэр ыытыллыбыт дьоро киэһэҕэ мустубут дьону баһылык Прокопий Федотович Румянцев, улуустааҕы инбэлииттэр уопсастыбаларын бэрэссэдээтэлэ Елизавета Николаевна Васильева эҕэрдэлээтилэр. Нэһилиэк Бочуотунай грамотатынан Мария Петровна Пестрякова уонна Иннокентий Петрович Бурнашев наҕараадаланнылар.
Инбэлииттэр уопсастыбаларын үс актыбыыһа Любовь Николаевна Саввина, Марфа Николаевна Андреева уонна Аксинья Афанасьевна Бережнева Анал байыаннай дьайыыга анаан 16 плащ-балаакканы, 34 харысхалы тигэн, бүгүҥҥү үөрүүлээх күҥҥэ махтал тыллары иһиттилэр, истиҥ бэлэҕи туттулар.
Бу күн ураты түгэнинэн Мүрүгэ олорор доруобуйаларынан хааччахтаах дьон үлэлэрин быыстапкатын көрүү буолла. Тэрээһин куонкурус быһыытынан ыытылынна. “Саха сатаабата диэн суох” диэн маны этэн эрдэхтэрэ! Далбар хотуттар сырдык санааларын, кэрэ ыраларын эҥинэ бэйэлээх иис оҥоһуктарыгар тиспиттэрин кэккэлии тэлгэппиттэр. Тэрийээччилэр үлэлэри оҕуруонан уонна иис оҥоһуктар диэн арааран түмүгү таһаардылар. Бу икки көрүҥҥэ Мария Петровна Пестрякова ойуччу ордуктук көһүннэ. Любовь Николаевна Саввина, Марфа Николаевна Андреева, Валентина Захаровна Лукина, Светлана Ильинична Горохова кыттыыны ыллылар. Иискэ кинилэри тэҥэ Аксинья Афанасьевна Бережнева оҥоһуктара турдулар.
Киһи дьоҕура муҥура суох буоллаҕа. Аныгы кэмҥэ дэлэй атыыланар таҥас-сап, матырыйаал арааһа тарбах талаана тахсарыгар олус абыраллаах. Эйэлээх дьиэ кэргэн ийэлэрэ, эбэлэрэ саха таҥаһын, киэргэлин киһи эрэ кэрэхсиэх курдук ситэрбиттэр, хараҕа халтарыйыах курдук аттарбыттар. Төһө даҕаны күннээҕигэ доруобуйаларынан мэһэйи көрүстэллэр, таптыыр дьарыктарын инники тутан, олохторун суолталыыллар, күннэрин киэргэтэллэр.
Мустубут дьон итини таһынан “Түмэр күүс” диэн араас түһүмэхтээх, көрдөөх күрэхтэһиигэ Мүрү нэһилиэгин успуорка инструктора Николай Наумов салайыытынан кытыннылар.
Ити курдук, дьоро күн көхтөөхтүк, түмсүүлээхтик, ону тэҥэ түмүктээхтик ааста. Саҥа бэрэссэдээтэлэммит уопсастыбаҕа таһаарыылаах үлэни баҕарабыт.
Уйаара КУСТУК.