Сахалар былыргыттан күүстээх-уохтаах, дириҥ санаалаах дьону холобур оҥостоллоро, көлүөнэттэн көлүөнэҕэ ыччаттарын оннук тыыҥҥа уһуйаллара. Онон киһи үтүө аатыттан ордук уһун үйэлээх туох да суох. Киһи киһиттэн үөрэнэн киһи-хара буолар, көлүөнэттэн көлүөнэҕэ уһуйуллан олоҕу салгыы сайыннарар.
Биһиги кылааспытыгар успуорт мэлдьи инники күөҥҥэ сылдьара. Ол биһиги физрукпут, уруккута сахалартан биллиилээх гимнаст Афанасий Гаврильевич Колодезников айымньылаах үлэтин түмүгэ. Ону биир биһиги кылааспытыттан түөрт уол физрук идэтин талбыта туоһулуур. Олортон саамай бастыҥ ситиһиилээхтэрэ Валерий Данилов 23 сааһыгар көҥүл тустууга Сэбиэскэй Сойуус успуордун маастара буолбута. Таджикскай ССР физкультурнай институтугар үөрэнэ сылдьан өрөспүүбүлүкэҕэ икки төгүл чөмпүйүөннүүр, бүтүн Сойуустааҕы хаста да турнир кыайыылааҕа буолар. Дойдутугар кэлэн, 1977 сыллаахха өрөспүүбүлүкэ чөмпүйэнээтигэр элбэх күүстээх маастары кыайан, бириистээх миэстэлэргэ тиксибитэ. Онон өрөспүүбүлүкэҕэ биир күүстээх маастар буоларын дакаастаан турардаах.
Валерий Данилов Бэрт Ууһун нэһилиэгиттэн ССРС успуордун маастара ааты бастакынан ылбыта. Онон биһиги эрэ кылаас буолбакка, бүтүн нэһилиэк киэн туттуута буолар. Хаһан баҕарар, ханна баҕарар бастакынан суолу тэлии уустуктардаах, ыарахаттардаах. Ол да иһин, бастакылары ураты чорботон бэлиэтииллэр, сыаналыыллар. Ити үтүө холобуру таба өйдөөн, Бэрт Ууһун нэһилиэгин дьаһалтата, баһылык Илья Ильин оскуоланы бүтэрбиппит 55 үбүлүөйдээх сылбытынан сибээстээн, Валерий Иванович тустубут ыйааһыныгар нэһилиэк ыһыаҕар анал бирииһи туруоруоҕа диэн эрэнэбит. Бу билиҥҥи кэмҥэ ыччат успуордунан дьарыктанарыгар үтүө холобур буолуоҕар саарбахтаабаппыт.
Валерий Иванович Данилов олоҕун устата араас салайар үлэлэргэ айымньылаахтык үлэлээн, Саха өрөспүүбүлүкэтигэр муниципальнай салайыыга уонна ыччат политикатын туйгуна бэлиэнэн наҕараадаламмыта. Үлэтин «Лена» совхоз комсомольскай тэрилтэтин сэкирэтээринэн саҕалаабыта, «Мүрү» совхоз дириэктэринэн, Бэрт Ууһун нэһилиэгин баһылыгынан, өр кэмҥэ Уус Алдан улууһун дьаһалтатын специалиһынан таһаарыылаахтык үлэлээбитэ.
Миитэрэй Стручков, методист учуутал, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ