Саҥа үөрэх дьыла саҕаламмытынан Уус Алданнааҕы техникумҥа СӨ Бырабыыталыстыбатын бэрэссэдээтэлин солбуйааччы Сергей Местников сырытта.
Сергей Местников «Үөрэхтээһин» национальнай бырайыак чэрчитинэн тутуллубут эбийиэктэри итиэннэ 70-с сылларга үлэҕэ киирбит эргэ, өрөмүөннэнэллэрэ уолдьаспыт мас эбийиэктэри көрдө. Кэлэктииби кытта көрсүһүүгэ үлэһиттэр техникум 220 миэстэлээх саҥа дьиэтин, устудьуоннар олорор уопсайдарын, успуорт саалатын саҥардыыны туруорустулар.
Онуоха Сергей Местников бу үөрэх кыһатын үлэтин-хамнаһын, үлэһиттэр, үөрэнээччилэр ситиһиилэрин үрдүктүк сыаналаата. Итиэннэ үчүгэй сонунун үллэстэн, кэлэктииби үөртэ. Ол курдук: «Эһиил «2023-2027 сс. судаарыстыбаннай профессиональнай үөрэхтээһин тэрилтэлэрин хааччыйыы уонна кинилэр хапытаалынай өрөмүөннэрэ» бырагырааманан техникумҥа 67 525 000 солкуобай үп көрүллүөҕэ», – диэн эттэ.
Аан бастакынан уопсай дьиэ уонна успуорт саалатын хапытаалынай өрөмүөнэ оҥоһулларын ситиһэри, ол кэнниттэн 220 миэстэлээх техникум эбийиэгин бырайыактыыр-сметалыыр документациятын түмүктүүрү бэлиэтээтэ. Уонна үрдүк көрдөрүүлээх устудьуоннардаах профессиональнай үөрэх тэрилтэлэрин бэлиэтиир сыаллаах СӨ Баһылыгын гранын ыларга сайаапка түһэрэргэ сүбэлээтэ.
Түмүккэ бу сыллар тухары СӨ Бырабыыталыстыбата үөрэх кыһата сайдарыгар, үлэтин түмүгэ көстөрүгэр сөптөөх көмөнү оҥорон кэлбитинэн техникум дириэктэрэ Андрей Стрекаловскай махталын тиэртэ. Маны сэргэ үлэҕэ-хамнаска ситиһиилэри баҕаран туран, техникум үйэ аҥаардаах историятын кэрэһэлиир кинигэни бэлэх уунна.
Ольга Шепелева