Уус Алдан улууһугар тыа хаһаайыстыбатын салаатыгар сыллааҕы үлэ түмүгүн таһаарар үгэс буолбут үөрүүлээх тэрээһин урукку кэмҥэ өрөспүүбүлүкэҕэ тиийэ тахсыылаах үлэлэринэн аатырбыт “Дүпсүн”, Партизан Заболоцкай аатынан уонна Герой Егоров аатынан совхозтар үбүлүөйдээх 50 сылларын кытта дьүөрэлээн ыытыллыаҕа.
Ол курдук сэбиэскэй кэмҥэ бу совхозтартан Социалистическай Үлэ Геройа Анастасия Копырина, оччолорго “Слава” уордьанынан наҕараадаламмыт, кэлин Саха сириттэн бастакынан Россия Үлэҕэ Дьоруойунан ааттаммыт Михаил Готовцев, килбиэннээх үлэлэринэн аар-саарга аатырбыт онтон да атын туруу үлэһиттэр тахсыбыттара. Онон оччотооҕу салайааччылар, бэтэрээннэр Уус Алдан улууһун салалтатыгар этии киллэрэн, икки өттүтэн сөбүлэһэн, бу совхозтар тэриллибиттэрэ үйэ аҥаардаах үбүлүөйдээх сылларын улуус таһымыгар бэлиэтииргэ диэн быһаарыллан тэрийэр хамыыһыйа бигэргэммитэ.
Бүгүн хамыыһыйа бастакы тэрээһин мунньаҕа буолла, мунньаҕы улуус баһылыгын бастакы солбуйааччы Илья Артамонов ыытта. Үс совхоз үбүлүөйүн тэҥҥэ тутан бэлиэтиир тэрээһин ааспыт кэм үлэһит дьонун чиэстээн, кинилэр килбиэннээх үлэлэрин суолун кэнчээри ыччакка, эдэр көлүөнэҕэ билиһиннэрэр, патриоттуу тыыҥҥа иитэр улахан суолталаах буолуоҕа диэн этилиннэ. Онуоха дойдуга, өрөспүүбүлүкэбитигэр, улууспутугар Дьиэ кэргэн, Оҕо саас уонна Аҕа сыллара биллэриллибиттэрэ оччотооҕу кэм туруу үлэһиттэрин дьиэ кэргэттэригэр, оҕолоругар-урууларыгар, кинилэр сыдьааннарыгар дьоннорун ааттарын үйэтитэллэригэр төһүү буолуоҕа.
Диана Седалищева