РФ Президенин талар быыбар ЦИК быһаарыытынан бу дьыл кулун тутар 15 күнүттэн 17 күнүгэр диэри үс күн толору ыытыллар. Быйылгы быыбарга талыллыбыт президент инаугурацията быйыл ыам ыйын 7 күнүгэр ыытыллара былааннанар, ол быһыытынан президент алта сылга, ол эбэтэр 2030 сыл ыам ыйын 7 күнүгэр диэри дуоһунаһыгар олоруоҕа. РФ Президенин дуоһунаһыгар барыта түөрт кандидат сүрүн баартыйалартан уонна бэйэ туруорунуутунан регистрацияламмыттар.
Быыбар улуустааҕы хамыыһыйатын бэрэссэдээтэлэ Александра Аянитова иһитиннэрбитинэн, Уус Алдан улууһугар барыта 36 быыбардыыр учаастак бүгүн сарсыарда 8.00 чааска бары аһылыннылар, быыбардааччылар тоҕуоруһан эрэллэр. Дойдубут президенин талар үс күннээх эппиэттээх сүрүн быыбарга УИК 218 чилиэнэ, ТИК 8 чилиэнэ уонна 97 кэтээн көрөөччү үлэлииллэр, 14 163 быыбардааччы куоластарын биэриэхтэрэ.
Быыбардааччы испииһэгиттэн барыта 2 641 киһи быыбар күннэригэр атын сиргэ баар буолалларынан, испииһэктэн сайабылыанньанан таҕыстылар, ол оннугар улууска прописката суох буолан баран, быыбар күнүгэр баар буолар 888 киһи сайабылыанньанан быыбар испииһэгэр киирэн биэрдэ.