Муус устар 11 күнүгэр “Улуус дьахталлара – үйэлэр үктэллэринэн”диэн ааттаах улуус дьахталларын хамсааһынын 100 сыллаах үөрүүлээх үбүлүөйдээх форума Бороҕоҥҥо Күлүмнүүр аатынан култуура дыбарыаһыгар ыытылынна. Тэрээһин бу бэлиэ даатаны көрсө улуус дьахталларын хамсааһынын 100 сыллааҕы үлэтин-хамнаһын сырдатар кинигэ биһирэмиттэн саҕаланна.
Кинигэни улуус историятын музейын научнай сотруднига Зоя Белолюбская редакционнай коллегияны кытта үлэлэһэн элбэх архыып матырыйаалын, урукку сэдэх хаартыскалары киллэрэн туран, сүдү историческай суолталаах кинигэ буолан тахсыбытын сиһилии билиһиннэрдэ. Бу кинигэ өрөспүүбүлүкэ улуустарыттан биир бастакынан бэчээттэнэн, дьахталлар хамсааһыннара сурукка-бичиккэ үйэтитилиннэ. Манна ааспыт үйэ 20-с сылларыттан саҕалаан улууспут бастакы анал үөрэхтээх, саҥа олоххо көхтөөх сыһыаннаах, үлэни-хамнаһы өрө туппут, норуоту сырдыкка сирдээбит кэрэ аҥаардар олохторо сырдатылынна.
Үбүлүөйдээх тэрээһиҥҥэ СӨ дьахталларын Сүбэтин бэрэссэдээтэлэ Анжелика Андреева, СӨ наставниктарын Сүбэтин бэрэссэдээтэлэ Анна Пермякова кыттыыны ыллылар. Итиэннэ улууспут олоххо көхтөөх дьахталлара олоҕу хамсатан, ханнык да кэмҥэ олоххо сирдээччи, тэрийээччи, айааччы быһыытынан биллэр-көстөр оруоллаахтарын бэлиэтээн туран, актыбыыс кэрэ аҥаардарга үрдүк наҕараадалары туттардылар. Ол курдук РФ Саха сириттэн сенатора Сахамин Афанасьев аатыттан бэлиэни киин балыыһа трансфузиолог бырааһа, общественница Дария Находкинаҕа, норуот маастара Екатерина Бочкареваҕа, общественница Виктория Сторожеваҕа туттарда. СӨ дьахталларын хамсааһынын түөскэ кэтиллэр бэлиэни өр сылларга улууска ийэ, оҕо хамсааһынын түстэспит Наталья Говороваҕа, улуус дьахталларын Сүбэтин бэрэссэдээтэлигэр Валентина Шадринаҕа, о.д.а. туттарда.
Улуус баһылыгын солбуйааччы Анатолий Сторожев дьахтар, ийэ оруола олоххо саамай сүдү суолталааҕын билинэн, бэлиэтээн туран, кэрэ аҥаардарбыт улуус тыатын хаһаайыстыбатыгар, үөрэҕириитигэр, культура, доруобуйа харыстабылын салаатыгар итиэннэ общественнай олоххо киллэрэр кылааттарын бэлиэтээн туран, СӨ Правительствотын бэрэссэдээтэлин грамотатын Зоя Белолюбскаяҕа, Ил Түмэн бэрэссэдээтэлин 1кы солбуйааччы бочуотунай грамотатын Матрена Мырсановаҕа, Евдокия Местниковаҕа, Сардана Босиковаҕа туттарда. “Уус Алдан улууһун социальнай-экономическай сайдыытыгар кылаатын иһин” бэлиэнэн Дүпсүнтэн Татьяна Горохова, улуус баһылыгын Бочуотунай грамотатынан Мария Федорова, Таисия Базарова, Варвара Попова наҕараадаланнылар.
Дьокуускайтан анал байыаннай дьайыыга көмөнү сүрүннэһэр биир дойдулаахпыт Анна Ефимова аһыныгас санаалаах кэрэ аҥаардарга махтанан туран, күннэтэ кыайыыны чугаһатар күүстээх үлэлэригэр ситиһиини баҕарда. 2022 сылтан саҕалаан 130 тонна гуманитарнай көмө, аадырыстаах баһыылка хорсун буойуттарбытыгар тиийэн күүс-көмө, бигэ тирэх буолалларын сырдатта. “Швейный патриот” диэн хамсааһын нөҥүө дронтон харыстыыр суорҕан тигиитигэр кэрэ аҥаардар сынньанары билбэккэ сыраларын, сүрэхтэрин сылааһын ууралларыгар дириҥ махталын тириэртэ. Бастыҥ волонтердарга түөскэ кэтиллэр бэлиэни Светлана Аржаковаҕа, Розанна Дегтяреваҕа, Любомира Дмитриеваҕа, Агафья Гороховаҕа, о.д.а. туттарда. “Россия волонтера” бэлиэнэн Өспөх нэһилиэгин баһылыга Лена Свешникова наҕараадаланна.
Салгыы улуус нэһилиэктэриттэн кэлбит бастыҥ үлэлээх Далбар Хотуттар тэрийэн ыытар үлэлэрин, инники былааннарын туһунан иһитиннэрдилэр. Форум түмүгүнэн анал резолюция ылыллан, инники сайдар суол торумнанна, кэскиллээх сыал туруорулунна.
Светлана Сивцева