Бүгүн Уус Алдан улууһун роддомугар быйыл бастакынан күн сирин көрбүт оҕо үөрүүлээх быһыыга-майгыга дьиэтигэр таҕыста.
Саһылыкаан бөһүөлэгин олохтоохторо Айыына, Егор Сотрудниковтар үһүс оҕолоро 4400 кг ыйааһыннаах, 58 см уһуннаах бухатыыр уолчаан дьиэтигэр тахсарын билбиттии бэбээрэ көрүстэ.
Элбэх оҕолоох ыал аатын сүкпүт дьиэ кэргэни эҕэрдэлээн туран, улуустааҕы социальнай көмүскэл управлениетын начальнига Елена Кривошапкина «Дети столетия» тус сыаллаах хапытаалы ылар туһунан сертификаты туттарда. Улуустааҕы ЗАГС отделын салайааччыта Алена Мигалкина кырачаан уолчаан төрөөбүтүн туһунан туоһу суругу, онно кини аата Кирилл Егорович Сотрудников диэн суруллубутун доргуччу иһитиннэрдэ.
Итиэннэ улуус дьаһалтатын социальнай уонна ыччат политикатыгар управлениетын начальнига Валентина Андросова, улуус киин балыыһатын кылаабынай бырааһын солбуйааччы Алина Абрамова, улуустааҕы дьахталлар сэбиэттэрин чилиэнэ Сардаана Босикова уонна Варвара Сыроватская салалталаах улуустааҕы төрүүр дьиэ эйэҕэс коллектива эҕэрдэ бастыҥын, бэлэх маанытын туттаран, эдэр ийэ сүрэҕин долгуттулар.
Айыына Александровна уолчаанын Аҕа дойдуну көмүскээччилэр күннэрин көрсө олунньу 22 күнүгэр күн сиригэр көрдөрбүтэ. Онон дьиэ кэргэн күн күбэй ийэтэ Россияҕа Дьиэ кэргэн сылыгар дьиэ кэргэннэрэ хаҥаата, Саха сиригэр Оҕо саас сылыгар кырачаан оҕону бэлэхтээтэ, Уус Алдаҥҥа Аҕа сылыгар Егор Сотрудников үһүс төгүлүн аҕа үрдүк аатын сүктэ.
Ольга Шепелева