Аан маҥнайгытын ыытыллар «Аар Кудай» кэрэ көстүү уонна сиэрдээх майгы Норуотттар икки ардыларынааҕы күрэһэ кулун тутар 8 күнүттэн саҕаламмыта. Күрэх муҥутуур финала кулун тутар 16 күнүгэр Суорун Омоллоон аатынан Опера уонна балет тыйаатырыгар ыытыллыаҕа.
Уус Алдаммыт кэрэ куолара Сардаана Гуляева (Чараҥ), Алтаана Мигалкина (Бороҕон), Инна Данилова-Ушницкая (Кэптэни), Алина Емельянова (Бороҕон), Арылы Джаэль Илларджио (Суотту) бу «Аар Кудай» үрдүк аатын ылар күрэскэ кытта сылдьаллар. Кинилэр туһунан кылгастык кэпсээтэххэ, маннык.
«Аар Куо» номинацияҕа (титулга):
- Арылы Джаэль
Суоттуттан төрүттээх, Лөгөй орто оскуолатын 2019 сыллаахха бүтэрбит
– Оҕолонон баран, бэйэбэр олус бүгэн хаалбытым, дьүөгэм сүбэтинэн даҕаны уонна бэйэм да баҕабынан, дууһам кутун туттаран, Зарьяна Юмшанованы көрөөт, алтыһаат тута «Аар Кудайга» кэлбитим.
«Аар Хотун» номинацияҕа (титулга):
Инна Данилова-Ушницкая
Кэптэниттэн төрүттээх, Саха Бельгийскэй гимназияны 2008 сыллаахха бүтэрбит.
Ааспыт сылтан чараас эйгэни кытта үлэлиир, дьоҥҥо-сэргэҕэ көмөлөһөр,киһи олоҕун суолун, доруобуйатын туругун чэпчэтэргэ үлэлэһэр.
– Доҕотторум сүбэлэринэн, суһаллык сайаапка ыытан бу күрэскэ кэлбитим. «Аар Кудай»-га бэйэбин тургута, кутталбын суох оҥоро, нууччалыы эттэххэ, «вызов» быраҕан кытта сылдьабын.
Алина Емельянова
Бороҕонтон төрүттээх, Дьокуускайга улааппыт. Урбаанньыт, «Alinails» тыҥырах оҥорор салон салайааччыта, төрүттээччитэ. Кыыс оҕолоох.
– Куонкуруска кыттарга тута сөбүлэспитим, олохпор туох эрэ саҥаны түстүү, кэрэни элбэтэ. Олох биирдэ бэриллэр!
Алтаана Мигалкина
Бороҕонтон төрүттээх, икки уол оҕолоох, дьарыктанар идэтэ – уҥуох тутааччы. Дьарыктаммыта 10-тан тахса сыл буолла.
– Күрэскэ бэйэм туһунан кэпсээри, көрдөрөөрү кэллим. Кыргыттары кытта саҥа билсии-көрсүү, үөрүү-көтүү саҥа энергия хамсата сылдьабыт, олус сырдык эйгэлээхпит. Бастаан кэлэрбэр куттал баар этэ, кими да билбэппиттэн, ол эрээри кыргыттар бары олус аһаҕастар, эйэҕэстэр, онон астынным аҕай. Бу аҕыйах күн иһигэр номнуо камера иннигэр холкутук туттарга, бэйэбин ылынарга үөрэнним.
«Аар Далбар» номинацияҕа (титулга)
Сардаана Гуляева
Чараҥ бөһүөлэгиттэн төрүттээх, Мүрү 1-кы №-дээх орто оскуолатын бүтэрбит. Үс уол оҕолоох. Дьокуускай куорат 5-с №-дээх оскуолатыгар математика учуутала, библиотека сэбиэдиссэйэ.
– «Аар Кудай» күрэскэ илэ кэпсэтиини ааһан, сааһынан араараллара чиэһинэй диэн сэргээн кыттабын. Кэрэ аҥаардарга холобур буолуохпун баҕарабын. Туохтан да иҥнибэккэ, иннилэрин хоту баран иһэллэригэр, баҕа санааларын толоро сылдьалларыгар баҕарабын.
Уйгулаана ПОРТНЯГИНА