Тохсунньу 25 күнэ – Россияҕа устудьуон күнэ, бу даата 2005 сылтан ыла дойдубутугар бэлиэтэнэр. Уус Алдан улууһугар соҕотох профессиональнай орто үөрэх кыһата Суотту Уус Алданнааҕы техникума буолар. Манна билигин барыта 205 устудьуон 9 араас хайысханан үөрэнэр. Устудьуон күнүнэн кинилэртэн хайдах үөрэнэ сылдьалларын, инники былааннарын, бииргэ үөрэнэр доҕотторун, уһуйааччыларын туһунан ыйыталастыбыт.
Саина Соловьева, «Повар, кондитер» салаатын 3 куурсун устудьуона
- Аҕам туйаҕын хатаран повар идэтин баһылыахпын баҕарбытым. Кыра кылааска үөрэнэ сылдьан ас астыырбын, эбэм, ийэм хайдах астыылларын көрөрбүн олус сөбүлүүр этим. Бу үөрэҕи бүтэрдэхпэ, үрдэтинэр былааннаахпын. Кураторбыт Алена Васильевна Охлопкова, маастарбыт Алена Михайловна Стрекаловская биһигини уһуйаллар, такайаллар. Ас арааһын астыырга, куукунаҕа санитарнай ирдэбиллэри тутуһарга, о.д.а. идэбит араас тиэхиньикэтигэр уһуйаллар. Техникумҥа үөрэнэрбин астынабын, ордук повардар күрэхтэригэр кыттарбын сөбүлүүбүн. Маннык күрэхтэргэ кыттан саҥа билиини ылаҕын, атын бүлүүдэлэри астыыры баһылыыгын.
Айтал Москвитин «Мастер по ремонту и обслуживанию автомобилей» салаатын 1 куурсун устудьуона
- Мин 2023 сыллаахха Г.В. Егоров аатынан Мүрү 1-гы №-дээх орто оскуолатын 9 кылааһын бүтэрэн баран Уус Алданнааҕы техникумҥа үөрэнэ киирбитим. Кураторым Майя Михайловна Бочкарева биһигини омук тылыгар үөрэтэр. Бу идэбин техниканы оҥостору хас биирдии эр киһи сатыахтаах диэн санааттан талбытым. Үөрэхпитин 2 сылы кыайбатынан бүтэриэхтээхпит. Бүтэрэн баран салгыы үрдүк үөрэх кыһатыгар туттарсар сыал-сорук баар. Бастакы семестрбын үчүгэйдик түмүктээтим. Группабытыгар барыта уолаттар буолан үөрэнэбит. Устудьуон олоҕо диэн олус интэриэһинэй. Нэдиэлэ ахсын араас тэрээһиннэр буолаллар. Онно кураторбытын кытары бары кыттабыт. Сэтинньигэ Аллараа Бэстээххэ баар транспортнай техникумна баран, орто-анал үөрэх кыһатын устудьуоннарын икки ардыгар IT технологиялар күрэхтэригэр кыттан, 3 миэстэ буолбуппут. Үөрэхпин сөбүлээтим, элбэх табаарыстанным.
Алексей Слепцов «Мастер по ремонту и обслуживанию автомобилей» салаатын 1 куурсун устудьуона
- Уус Алдан улууһугар техникум баарын туһунан оскуолаҕа үөрэнэ сылдьан истэн, Дьокуускай куораттан 9-с кылаас кэнниттэн кэлэн туттарсыбытым. Үөрэхпит олус интэриэһинэй, бастакы семестири үчүгэйдик түмүктээтим. Элбэх табаарыстанным. Күн аайы араас тэрээһиннэргэ бэлэмнэнэбит. Кураторбыт Майя Михайловна Бочкарева биһигини иллэҥ оҥорбот. Бөлөхпүтүгэр ансаамбыл тэринэн «Ырыа уйан кутугар уйдаран» ырыа күрэҕэр кыттан, “Доҕордоһуу” архитектурнай музейыгар сынньанар, күүлэйдиир путевканы ылбыппыт. Ол кэнниттэн “Две звезды” диэн орто анал үөрэх кыһаларын устудьуоннарын икки ардыларыгар ыытыллар республикатааҕы күрэххэ техникум аатыттан кыттыбытым.
Михаил Филатов «Мастер по ремонту и обслуживанию автомобилей» салаатын 1 кууруһун устудьуона
- Уус Алдаҥҥа мин кыра эрдэхпиттэн баҕарар үөрэҕим баар эбит диэн оскуолаҕа үөрэнэ сылдьан истибитим. Бэйэм Таатта улууһуттан кэлэн кууруспар үчүгэйдик үөрэнэ сылдьабын. Билигин бөлөх старостатабын. Кэлиэхпиттэн ыла үөрэхпит таһынан араас тэрээһиннэргэ соҕотоҕун уонан бөлөҕүнэн кыттабын. Ансаамбыл тэринэн араас куонкурустарга ситиһиилэнэбит. Аллараа Бэстээх транспортнай техникумугар устудьуоннар күрэхтэригэр однокурснигым Тимофей Обутовтыын «Лучший автомеханик» анал аатын ылбыппыт. Маастарбыт Николай Валерьевич Ордахов, кураторбыт Майя Михайловна Бочкарева. Үөрэхпит интэриэһиргиир киһиэхэ олус үчүгэй, ону таһынан араас тэрээһиннэр ыытыллар буолан, күммүтүн билбэккэ да хаалабыт.
Ольга Дьячковская, “Защита в чрезвычайных ситуациях” салаатын 1 кууруһун устудьуона
- Инники олохпор дьоҥҥо көмөлөһөөрү уонна айылҕаны харыстыырга үлэлэһээри бу идэни талбытым. Биһиги кураторбыт Ньургустаана Ньургустаановна Винокурова буолар. Техникуму олус сөбүлээтим, элбэх оҕону кытта билсэн, доҕордоһон дьоллоохпун. Бары ыытыллар тэрээһиннэргэ көхтөөхтүк кыттабын.
Алена Стрекаловская, Екатерина Захарова.