Бүгүн – Арассыыйа коллекционердарын күнэ. Бу күн 2016 сыллаахха Арассыыйа үрдүнэн коллекционердар бастакы сийиэстэрэ буолбута. Онно балаҕан ыйын 21 күнүн Арассыыйа коллекционердарын күнүнэн биллэрэргэ быһаарыныы ылыллыбыта.
Биһиги улууспутугар Станислав Луковцев салайааччылаах «Умсулҕан» коллекционердар түмсүүлэрэ бэрт көхтөөхтүк үлэлиир. Тиэмэлэринэн көрөн араас тэрээһиннэргэ кинилэр умсугутуулаах быыстапкалара дьон-сэргэ болҕомтотун ылыан ылар.
Станислав Николаевич түмсүү бүгүҥҥү олоҕун туһунан кылгастык бу курдук кэпсиир:
– Кэлэр сылга түмсүүбүт 30-с сылын бэлиэтиибит. Онон эһиилги тэрээһиммитигэр бэлэмнэнэбит. Сылтан сыл элбээн иһэбит. Былырыын өрөспүүбүлүкэбит 100 сылыгар анаан, түмсүүбүтүгэр сүүс коллекционеры түмэбит диэн сорук туруоруммуппут. Нэһилиэктэргэ филиаллар бааллар, онон улууһу бүтүннүү хаптыбыт диэххэ сөп.
Сүрүннээн, актыыбынай, дьаныһан туран дьарыктанар 30-ча коллекционер баар. Күн бүгүн 10 коллекционер Чурапчы улууһугар буолар көрсүһүүгэ айаннаатылар. Сыл аайы коллекционердар сийиэстэригэр сылдьабыт. Икки коллекционербыт СӨ иһинэн «За заслуги в коллеционировании» диэн үрүҥ көмүс бэлиэлээхтэр.
Билигин түмсүүбүтүгэр оҕолортон саҕалаан ытык саастаах кырдьаҕастарга тиийэ бааллар. Манньыаттан, значоктан, открыткаттан саҕалаан спорт, ускуустуба тиэмэтигэр, кыыл-сүөл, онтон да араас статуэткалары, нло туһунан, бэлиэ күннэргэ уонна космос-авиация тиэмэтигэр анаммыт кэллиэксийэлээхтэр, глобус, мэкчиргэ, кэҕэлээх чаһы, былыргы иһит-хомуос, кофе бааҥкатыгар тиийэ мунньааччылар үксээтилэр.